किपट खोसिएको याक्थुम्बा
पगरी खोसिएको किरात जाति

तीतेपातीको झ्याङ
अलैंचीका बोटहरू
घरछेउको कान्लामा नै छाडेर

हिंडेको छ
ट्रयाक्टरको ट्रली चढेर सुस्तरी सुस्तरी

बाँदरले दुःख दिएका कारण
उठेको बस्तीको
छानाबिनाको घर
र
जिन्दगीका अटोग्राफमा लेखिएका
क्रान्तिकारी शब्दहरूलाई सुस्तरी सम्झिरहेका

भेटिन्छन्
जनयुद्ध लडेका सिपाहीहरू
पुराना पहाडमुनि
अचेल यता आइपुग्दैन
पार्टी हेडक्वाटरको नयाँ घोषणा

आइपुग्छन् त केवल
कवाडी सामानहरू खोज्दै
रक्सौलबाट
केही अपरिचित अनुहारहरू

सायद
मुटु मिलेको साथी पनि
बाँच्नुको खेलमा भिडिरहेछ
अरबतिर

विगत हिँडेको बाटोमा
अझै छ घामको चित्र

छैनन् त केवल
समयका छायाहरू ।