लगभग दुई दशकसम्म, ‘रश आवर’ (Rush Hour) फिल्मको नयाँ किस्ता बन्न सकिरहेको थिएन । यसलाई हलिउडियाहरूले ‘विकासको नरक’ (development hell) भन्ने गर्थे । खासगरी फिल्मले सोचेजस्तो व्यापार नगरेपछि सम्भावना भएको फिल्मलाई कसरी बनाउने, बनाउने कि नबनाउने भन्ने दुविधा हुन्छ, त्यसलाई विकासको नरक भन्ने गरिन्छ ।

तर यसै हप्ता प्यारामाउन्ट (Paramount) स्टुडियोले ‘रश आवर’को चौथो शृंखला बनाउने निधो गरेको खबर सार्वजनिक भएको छ । प्रहरी सेवामा रहेका दुई जना साथी क्रिस टकर (Chris Tucker) र ज्याकी च्यान (Jackie Chan) लाई फेरि सिनेपर्दामा एकसाथ देखिने सम्भावना बढेर गएको छ । यसका लागि अमेरिकी राष्ट्रपति डोनाल्ड ट्रम्पलाई धन्यवाद दिनुपर्ने हुन्छ ।

रश आवरको पहिलो शृंखला सन् १९९८ मा आएको थियो । यो फिल्म त्यो बेला यति रूचाइएको थियो कि यसले संसारभरबाट २४४ मिलियन डलर कमाएको थियो । यसबाट उत्साहित भएको प्यारामाउन्टले सन् २००१ मा दोस्रो शृंखला बनायो र यसले संसारभरबाट ३४७ मिलियन अमेरिकी डलर बटुल्यो । तेस्रो शृंखलाले भने दोस्रोभन्दा कम व्यापार गरेको थियो । सन् २००७ मा रिलिज हुँदा यो फिल्मले २५६ मिलियन अमेरिकी डलर कमाएको थियो । यसपछि भने स्टुडियोले चौथो शृंखलालाई फिल्माङ्कन गर्ने गरी कुनै निर्णय गर्न सकेका थिएनन् ।

यतिबेला भने अप्रत्याशित उद्धारकर्ताका कारण यो फिल्मले पुनर्जीवन पाउने सम्भावना बढेर गएको छ । भनिन्छ, राष्ट्रपति ट्रम्पले प्यारामाउन्टका नयाँ मालिक डेभिड एलिसन (David Ellison) लाई यो फिल्मको सिक्वेल बनाउन दबाब दिइरहेका छन्। यसलाई राष्ट्रपतिले ‘हलिउडको स्वर्णिम युग’ ल्याउने प्रयासका रूपमा हेरिएको छ ।

गएको जनवरीमा पुनः कार्यभार सम्हालेदेखि, ट्रम्पले टिभी होस्टहरूसँग युद्ध छेडिसकेका छन् । उनीहरूलाई ट्रम्पले फेक न्यूजको फ्याक्ट्री भनेर किनारा लगाइसकेका छन् । रूढिवादी कलाकारहरूलाई हलिउडका राजदूत नियुक्त गरेका छन् र स्टूडियो अधिग्रहणहरूलाई आफूले रोक्न सक्ने स्पष्ट पारेका छन्। ह्वाइट हाउसको दबाबपछि स्टूडियोहरूले विविधतासम्बन्धी कार्यक्रमहरूमा कटौती गरेका छन्।

मनोरञ्जन उद्योगमाथि ट्रम्पले शक्ति प्रयोग गर्न थालेपछि उद्योगका नामचीन व्यक्तिहरूले खतराको घण्टी बजाएको महसूस गरेका छन् । यतिबेला हलिउडको बक्स अफिस आम्दानी घट्दै जाँदा ह्वाइट हाउसले यस किसिमको दबाब बढाउँदै जाँदा अझ बढी अँध्यारो समय आउने हो कि भन्ने डरले घर गर्न थालेको छ । एक दिग्गज निर्माताले भने, “राष्ट्रपतिले हलिउडको अनुहारमाथि आफ्नो गोडा दृढतापूर्वक दबाएका छन्।”

एलिसनले गएको अगस्टमा प्यारामाउन्टको लामो समयदेखिको अधिग्रहण प्रक्रिया पूरा गरेका थिए। उनका बुबा, प्रविधि टाइकुन ल्यारी एलिसन (Larry Ellison), विश्वका धनी व्यक्तिहरूमध्ये एक र राष्ट्रपतिका आर्थिक नीतिका समर्थक हुन्। एलिसनहरू वार्नर ब्रदर्स (Warner Bros) किन्न चाहन्छन् । केही व्यवसायीहरू भने यो स्टूडियो एलिसनहरूलाई नबेचियोस् भन्ने चाहन्छन् र हलिउडको बोलपत्र युद्धको केन्द्रमा यो किनाइ निकै चर्चामा छ। कुनै पनि सम्झौताका लागि नियामक अनुमोदन आवश्यक पर्ने भएकाले ट्रम्पसँगको उनीहरूको न्यानो सम्बन्धलाई अत्यन्तै फाइदाजनक रूपमा हेरिएको छ।

शोबिज (Showbiz) का सबैजना ट्रम्पको प्रभावलाई लिएर चिन्तित छैनन्। परम्परागत मूल्यमान्यताहरूको कदर गर्ने फिल्महरू निर्माण गर्ने डलास सोनियर (Dallas Sonnier) को विश्वास छ‑ हलिउडमा वैचारिक सुधार आवश्यक भइसकेको छ। सोनियर भन्छन्, “हामी अहिले एकदमै उत्साहित छौं, यसलाई हामीले एउटा ठूलो अवसरको रूपमा हेरेका छौं। हाम्रो संस्कृतिलाई कट्टरपन्थी पागलहरूले अपहरण गरेका थिए… र अब ट्रम्प फेरि सत्तामा छन् र दक्षिणपन्थीको उदय भएको छ । हामीसँग फेरि एकपटक मानिसहरूले मन पराउने फिल्महरू बनाउने वास्तविक मौका छ।”

सोनियर तिनै व्यक्ति हुन्, जसले हलिउडमा रेम्बो (Rambo) बनाएका थिए । अहिले सो फिल्मको प्रिक्वेल ‘जन रेम्बो’ (John Rambo) बनाउने तयारी गरिरहेका छन् । सोनियर यस्ता फिल्ममार्फत परम्परागत अमेरिकी मूल्यमान्यताहरूको कदर गर्ने परियोजनाहरूको लहर आउने भविष्यवाणी गर्छन्।

उनले भने, “हामी भावनामा डुबेका, दुःखी केटाका नाटकहरू हेर्न चाहँदैनौं। हामी हाम्रा फिल्मा हिरोहरू वीर हुने राम्रा फिल्महरू हेर्न चाहन्छौं। हामी कर्तव्य र सम्मानप्रति प्रतिबद्ध र मानसिक रूपमा बलियो भएका पुरुष पात्रहरू चाहन्छौं।”

‘रश आवर’ फिल्म यस आवश्यकतामा ठ्याक्कै फिट हुन्छ। यो फ्रेन्चाइज १९९८ मा शुरु भएको थियो । यसमा टकर र च्यानले फरक संसारका जासूसहरूको भूमिका निभाएका थिए । यस्तो घटना घट्छ, जसका कारण उनीहरू सँगै काम गर्न बाध्य थिए । ब्रेट राटनर (Brett Ratner) ले यी तीन वटै शृंखलालाई निर्देशन गरेका थिए । सन् २०१७ मा उनीमाथि यौन दुर्व्यवहारको आरोप लागेपछि चौथो फिल्म बन्न सकेन। उनले आफूले कुनै दुर्व्यवहार नगरेको भन्दै आरोपलाई अस्वीकार गरेका थिए।

यद्यपि, उनको करियर मेलानिया ट्रम्प (Melania Trump) बारेको फिल्ममा उनको संलग्नताले पुनर्जीवित भएको छ । मेलेनियामाथि बन्ने फिल्मलाई अमेजनले $४ करोड डलरमा किनेको छ र जनवरीमा रिलिज हुने तयारीमा छ। उक्त फिल्म बनाउने क्रममा, ५६ वर्षीय राटनरले राष्ट्रपतिको रिसोर्ट मार-ए-लागो (Mar-a-Lago) मा निकै लामो समय बिताएका थिए ।