बाढी पहिरोले ठूलो धनजन नोक्सान भएको खबर केन्द्रमा पुग्यो । मन्त्रीले स्थलगत निरीक्षण गर्न जानुपर्ने भयो । सञ्चार माध्यमहरूमा यो खबर पुग्यो ।

एउटा मुख्य पत्रिकाका सम्पादकले आफ्नो समाचार दातालाई बोलाएरु दुइटा समाचार तयार पार्न लगाए र भने, “यी दुई मध्ये एउटा समाचार छाप्नू ।”

मन्त्री महोदय हेलिकप्टरमा गएको खण्डमा यस्तो समाचार छापिनेछ –

‘यस्तो ठूलो विपत् र सङ्कटको बेलामा जनताको सम्पत्तिमा मोज गरेर हेलिकप्टरमा सयर गरेर आनन्द लिने मन्त्रीले जनताको दुःख बुझ्न सक्दैन । त्यस्तो मन्त्रीले राजीनामा दिनुपर्छ ।’

मन्त्री महोदय मोटरमा गएको खण्डमा यस्तो समाचार छापिनेछ –

‘यस्तो राष्ट्रिय विपत्तिको बेलामा प्रयोग गर्न राष्ट्रले ठूलो धनराशि खर्चेर किनेको हेलिकप्टर प्रयोग नगरी ढिलो सुस्ती गरेर समयमै उद्धार गर्न नसक्ने मन्त्रीले राजीनामा दिनुपर्छ ।’