इटालेली उपन्यासकार, कवि तथा नाटककार लुइजी पिरान्डेलो २८ जुन १८६७ का दिन दक्षिण सिसिलीको एग्रिजेन्टो नाउँको एउटा सानो गाउँमा जन्मेका थिए । उनका पिता स्टेफानो एक सम्पन्न उद्योगपति थिए । पिरान्डेल्लोले प्राथमिक शिक्षा घरमै पूरा गरे । सन् १८८० मा उनको परिवार सिसिलीको राजधानी पालेरमो बसाइँ सर्‍यो । १३ वर्षका पिरान्डेल्लोले त्यही शहरको हाईस्कुलमा नाम लेखाए र त्यहीँबाट स्कुले शिक्षा पूरा गरे। त्यहीँ पालेरमो युनिभर्सिटीमा उनले कानुन पढेका थिए ।

सन् १८८९ मा माल जियोकन्दो (Mal Giocondo) नाउँको उनको पहिलो कविता सङ्ग्रह प्रकाशित भयो । सन् १८९१ मा उनी जर्मनी गए र त्यहीँ बोन विश्वविद्यालयबाट तत्वज्ञानमा उपाधि प्राप्त गरे । त्यसपछि रोमबाट फर्केर उनले जर्मनीमा १९२३ सम्म शिक्षकको रूपमा काम गरे ।

सन् १८९४ मा लिसलुसा नाउँको उनको पहिलो उपन्यास निस्क्यो । इल फु माटिया पास्कल भन्ने उपन्यास प्रकाशित भए पछि उनको नाम सर्वत्र फिँजियो। पिराण्डेल्लो नाटक पनि लेख्थे र रोममा उनको आफ्नै नाट्यशाला पनि थियो। उनी प्रायः मध्यम वर्गीय समाजको चित्रण गर्दछन् र कल्पनालाई नाटकीय रूप दिन खप्पिस छन् ।

निम्नलिखित उनका प्रसिद्ध कृति हुन् :

१. गोली ठोक (Shoot), २. बुढो र जवान (The Old and The Young), ३. तीन नाटक (Three Plays), र ४. थप तीन नाटक (Three Further Plays)

मनोवैज्ञानिक विश्लेषणलाई नाटकीय रूप दिनसक्ने जादुमय शक्तिको निम्ति पिरान्डेल्लोलाई सन् १९३४ को नोबेल पुरस्कार प्रदान गरिएको थियो ।

डिसेम्बर १०, १९३६ मा इटालीको रोममा उनको देहान्त भयो ।