मंसिर २४, सोमबार १२:१५ 
|
|
योगेन्द्र तिमिल्सिनाफाल्गुन ७, सोमबार ००:०१ |
स्विडिस कवि तथा उपन्यासकार भर्नर भोन हेइदेन्स्तामको जन्म ६ जुलाई १८५९ मा स्विडेनको ओल्शाम्मरको एउटा सम्पन्न परिवारमा भएको थियो । बाल्यकालदेखि नै उनी शारीरिक रूपमा कमजोर र लज्जालु स्वभावका थिए । उनले एकेडेमी अफ स्टोकहोममा चित्रकलाको अध्ययन सुरु गरेका थिए, तर कमजोर स्वास्थ्यका कारण उनले अध्ययन छोड्नु पयो ।
उनलाई दमको रोग थियो । हावापानी परिवर्तन गर्न भनी उनलाई दक्षिण युरोप लगियो । आठ वर्षसम्म उनले इटाली, ग्रिस, स्विट्जरल्याण्ड आदि देशको भ्रमण गरे । दक्षिण युरोप र मध्यपूर्वमा उनले धेरै वर्ष बिताए । सन् १८८० मा एमिला उग्गाला नाउँ गरेकी एउटी स्विडिश युवतीसँग उनको प्रेम भएकोले उनले त्यसैसँग बिहे गरे । सन् १८८३ मा उग्गालाको मृत्यु भएपछि उनले अर्को विवाह गरे । सन् १८८७ मा उनका पिताको मृत्यु हुँदा उनी स्विडेन फर्के । उनले दोस्रो विवाह सम्बन्ध विच्छेद भई असफल भएपछि सन् १९०० मा उनले तेस्रो विवाह गरे। उनको यो विवाह पनि सफल हुन सकेन ।
हेइदेन्स्ताम स्विडेनका पूर्ववर्ती साहित्यकारहरूको प्रकृतिवादी साहित्यिक आन्दोलन विरुद्ध उभिएका थिए । उनले स्वैरकल्पनामा आधारित, सुन्दरता र राष्ट्रिय विषयमा साहित्य सिर्जना गरी साहित्यमा पुनर्जागरण ल्याउन साहित्यकारलाई आह्वान गरे । प्रकृतिवादी साहित्यिक आन्दोलनको विरुद्ध उनले पुनर्जागरण (Renaissance, 1889) शीर्षक लेख प्रकाशित गरे । उनको पहिलो कविता सङ्ग्रह तीर्थयात्रा र भ्रमणका दिनहरू (Pilgrimage and Wander Years, 1888) ले स्विडेनमा सफलता प्राप्त गरेको थियो । उनले ऐतिहासिक उपन्यासहरू पनि लेखेका थिए। ती मध्य दुई भागमा लेखिएको उनको कारोलिनेर्ना (Karolinerna, 1997-98), द चार्ल्स मेन (The Charles Men) र द ट्री अफ द फोल्कुड्स (The Tree of the Folkungs, 1905-07) प्रमुख हुन् । सन् १९१२ मा उनी स्विडेनको प्रज्ञा प्रतिष्ठानका सदस्य भए । उनले सन् १९१६ को साहित्यतर्फको नोबेल पुरस्कार जितेका थिए। उनका अन्य प्रमुख कृति यस प्रकार छन्-
१. एकान्त विचार (Thoughts in Loneliness), २. एक महिलालाई पुरुषको अन्तिम शब्द (A Man’s Last Word to a Woman), ३. गुस्ताफ फ्रोडिङको अन्त्यष्टी (The Burial of Gustaf Froding), ४ एण्डिमिअन (Endymion. 1889), ५. नीचहरू (The Carlists, 1897-98), ६. सुरक्षित घर (Fortified House) र ७ कैदी (Captured)।
मे २०, १९४० मा स्विडेनको ओव्रालिड स्थित आफ्नै घरमा भर्नर भोन हेइदेन्स्तामको मृत्यु भयो ।
यसलाई जीवित राख्नकोलागि तपाइँको
आर्थिक सहयोग महत्वपूर्ण हुन्छ ।
