साहित्यपोस्ट
नेपाली भाषा र साहित्यको सम्पूर्ण पत्रिका
Sahityapost Book

जेके रोलिङ वाक युद्धमा उत्रिइन्

Chovar Blues Mobile Size

बेलायती लेखकहरूको संस्था सोसाइटी अफ अथर्सकी अध्यक्ष जोआने ह्यारिसले उनको धारणा विपरीतका लेखकहरूलाई ज्यान मार्नेसम्मको धम्की आउँदा पनि कुनै प्रतिक्रिया नजनाएको भन्दै केही लेखकहरूले उनलाई आक्षेप लगाएका छन् ।

आक्षेप लगाउनेहरूमा जेके रोलिङ र अन्य केही लेखक रहेका छन् ।

चकलेट नामक प्रख्यात उपन्यास लेखेर चर्चा बटुलेकी जोआनेले सोही पुस्तकबाट दर्जनौँ पुरस्कार थापिसकेकी छन् । उनले इतर विचार राख्ने लेखकहरूको अधिकारप्रति मौनता साँधेर लेखकहरूमाथि आक्रमण गर्न सजिलो पारिदिएको भन्दै जेके रोलिङ लगायत अन्य लेखकहरूले असन्तुष्टि पोखेका छन् ।

रचेल रूनी र गिलियन फिलिपले पछिल्लो समय आफ्ना धारणा मुखर गरेको तर त्यसको बदलामा सर्वसाधारणले तिनीहरूमाथि तथानाम गरेको र त्यसमा लेखक संघकी अध्यक्षका हैसियतमा जोआनेले कुनै प्रतिक्रिया जनाएकी थिइनन् । जबकि अन्य बेला लेखकमाथि लगाइने आक्षेप र दुर्वचनमाथि लेखक संघले चर्को विरोध जनाउने गरेको थियो ।

गएको साता ह्यारी पोटर शृंखलाकी लेखिका जेके रोलिङले सलमान रूस्दीमाथि भएको आक्रमणको निन्दा गर्दै ट्विटरमा सानो टिप्पणी लेख्दा उनलाई ज्यान मार्ने धम्की दिइएको थियो ।

सो धम्कीको प्रहरीले अनुसन्धान गरिरहेको छ ।

तर लेखक संघकी अध्यक्ष जोआने ह्यारिसले लेखिका रोलिङलाई लक्षित गर्दै प्रिय लेखकहरू … तपाईंले ज्यान मार्ने धम्की पाइरहनु भएको हो ? (त्यो चाहिँ कत्तिको वास्तविक हो कि हल्ला मच्चाउनका लागि हो ?) भनी पोलिङ (मतदान) शुरू गरेकी थिइन् ।

पछि उनलाई केहीले रोलिङप्रति कत्तिको सहानुभूति छ भनी सोधेका थिए । जसमा उनले रोलिङ मात्र होइन, धम्की पाउने जोसुकै लेखकप्रति आफ्नो सहानुभूति रहेको र त्यस्ता क्रियाकलापको विरोध गर्नुपर्ने बताएकी थिइन् ।

तर द टाइम्ससँग कुरा गर्दै रोलिङले भने आफूले लेखक संघकी अध्यक्ष ह्यारिसबाट कुनै पनि किसिमको सन्देश र सहयोग नपाएको गुनासो गरेकी छन् ।

‘मलाई ट्विटरमा बलात्कार तथा हत्याको धम्की दिइएको छ, ह्यारिस भने ट्विटर पोलिङ (मतदान) मा व्यस्त हुनुहुन्छ,’ रोलिङले भनिन्, ‘यो कस्तो किसिमको सहानुभूति हो ?’

यसअघि सन् २०२० र २०२१ मा जेके रोलिङप्रति भएको धम्कीपूर्ण सन्देशमा लेखिका केट क्वार्मबाईले चासो व्यक्त गर्दै त्यस्ता अतिवादीहरूलाई कार्बाही गर्न सरकारलाई ध्यानाकर्षणसमेत गरेकी थिइन् । त्यो बेला केट लेखक संघको व्यवस्थापन समितिमा थिइन् ।

संघको वक्तव्य आउनेबित्तिकै जेके रोलिङमाथि भइरहेको आक्रमण स्वाट्टै घटेको थियो । एउटा सानो विज्ञप्तिले पनि ठूलो काम गर्ने र लेखकहरूबीच एकता रहेको सन्देश सर्वसाधारणमा जाने हुनाले यस्ता कुराको महत्त्व हुने केटको धारणा छ ।

सन् १८८४ मा द सोसाइटी अफ अथर्स स्थापना भएको थियो । यो लेखक, चित्राङ्कनकर्ता तथा साहित्यिक अनुवादकहरूको संयुक्त संस्था हो । यसका बेलायतभरि ११ हजार ९०० सदस्यहरू छन् ।

जेके रोलिङ भन्छिन्, ‘मलाई ज्यान मार्ने धम्कीप्रति संघको बेवास्ता कुनै छक्क पर्नुपर्ने विषय होइन । संघकी अध्यक्ष ह्यारिसले पहिलेदेखि नै यस्ता कुरामा उति चासो दिएकी थिइनन् । बरू लेखकहरू धेर बोल्नु हुन्न भन्ने धारणा पाल्ने व्यक्ति हुन् ।’

लेखकहरूले आफूलाई चित्त नबुझेको कुरामा स्वतन्त्र ढंगले धारणा राख्न पाउनुपर्नेमा हिजो पनि पक्षधर रहेको र भोलि पनि रहने रोलिङले बताएकी छन् । चाहे त्यो जतिसुकै अप्रिय कुरा किन नहोस्, व्रह्मले देखेको बोल्नुपर्ने रोलिङ बताउँछिन् । यसका लागि कसैले आफूलाई अस्वीकृत गर्ने, भेदभाव गर्ने गरे समयले मूल्याङ्कन गर्ने उनको धारणा छ ।

संसारभर लेखकको मुख थुन्ने, उसका कुरालाई सेन्सर गर्ने, जेल हाल्ने, मार्ने, घृणा फैलाउने तथा ट्रोलिङ गर्नेजस्ता कुराको सशक्त विरोध हुनुपर्ने र लेखक संघजस्तो शक्तिशाली संस्थाले त लेखकका पक्षमा पैरवी गर्नुपर्ने रोलिङको धारणा छ ।

अवार्ड विजेता कवि तथा बाल लेखिका रचेल रूनीले माई बडी इज मी पुस्तक लेखेपछि उनलाई यति धेरै अपमानित गरियो कि उनीविरूद्ध पुस्तक विद्रोह गर्ने अभियानै चलाइयो ।

ट्रान्सजेन्डर ट्रेन्ड नामक प्रकाशकले उनको सो पुस्तक प्रकाशन गरेको थियो । उनलाई ट्रान्सफोबिक भएको आरोप लगाइएको थियो ।

यस्तो बेलामा लेखक संघले कुनै पनि सहयोग नगरेर रचेल रूनीलाई मर्माहत पारेको आरोप रोलिङले लगाएकी छन् । स्वयं रूनीले पनि त्यो बेला आफूलाई चारैतिरबाट प्रहार हुँदा संघको सहयोग रत्तिभर नपाएकामा चित्त दुखाइरहेको बताएकी छन् । खासगरी अनलाइनमा हुने आक्रमण, ट्रोल, घृणास्पद अभिव्यक्तिजस्ता कुरामा संघले सचेत भएर त्यस्ता कार्यको विरूद्ध अभियान नै शुरू गर्नुपर्ने सुझाव रोलिङको छ । यसले स्वतन्त्र रूपमा अभिव्यक्त गर्ने अधिकार खोसिने र लेखकहरू क्रमशः आफैँ शब्दलाई छानीछानी बोल्नुपर्ने अवस्थामा पुग्ने र यसले सबैलाई हानि पुर्याउने धारणा रूनीको छ ।

रोचक त के छ भने रूनीको पुस्तक प्रकाशित भएपछि उनीविरूद्ध खनिएका केही व्यक्तिको लहलहैमा लागेर प्रकाशकले पुस्तक नै बजारबाट निकालेको र उनका कुनै पनि पुस्तक ननिकाल्ने घोषणा गरेको सन्दर्भमा लेखक संघले कुनै प्रतिक्रिया नदिएकामा चित्त दुखाएकी छन् ।

संघकी अध्यक्ष ह्यारिसले भने आफू लेखकलाई आउने जस्तासुकै धम्कीको प्रतिरोध गर्ने बताएकी छन् । आफू इतर लिङ्गीहरूप्रति समर्थक भएकै कारण तीन वर्षसम्म केही लेखकको कोपभाजनमा परेको स्मरण गराउँदै कसैको निजी धारणामा टिप्पणी उठाउँदै विरोध गर्न संघ अघि नसर्ने बताइन् ।

‘मैले जति विरोध त कसले भोग्यो होला ?’ उनले भनिन्, ‘त्यो बेला यी लेखकहरू आफैँ मेरो राजिनामाको माग गरिरहेका थिए । अहिले भने उनीहरू नै संघले बोलेन भनिरहेका छन् ।’

उनले भनिन्, ‘म लेखकमाथि हुने जस्तासुकै आक्रमण, विभेद, ट्रोलविरोधी हुँ । म आफैँ पनि दर्जनौँ पटक त्यस्ता कुराको प्रताडना भोगेकी व्यक्ति हुँ । त्यसैले लेखकहरूको त्यो पीडा बुझ्छु । म उहाँहरूसँगै छु ।’

 

लेखक परिचय

The Times is a British daily national newspaper based in London. It began in 1785 under the title The Daily Universal Register, adopting its current name on 1 January 1788. The Times and its sister paper The Sunday Times (founded in 1821) are published by Times Newspapers, since 1981 a subsidiary of News UK, in turn wholly owned by News Corp. The Times and The Sunday Times, which do not share editorial staff, were founded independently, and have only had common ownership since 1966.

प्रतिक्रिया
Loading...