साहित्यपोस्ट
नेपाली भाषा र साहित्यको सम्पूर्ण पत्रिका

भारतीय नेपाली पुस्तक : ‘रेडियोरिता’, ‘गोलसिमल’ र ‘फागुन ! तिमी फर्किआउनू’

Chovar Blues Mobile Size

१. रेडियोरिता – हर्कबहादुर लामगादे ‘रोहित’

भारतको मणिपुरका स्थानीय, राजधानी दिल्लीमा रही निरन्तर साहित्यकर्ममा सक्रिय हर्कबहादुर लामगादे ‘रोहित’को कथासङ्ग्रह हो, रेडियोरिता । दिल्ली बस्दै आए पनि उनका कथाहरुको परिवेश र पृष्ठभूमि मणिपुर नै रहेको छ । उनका कथाहरुमा आञ्चलिकताको सुगन्ध त छ नै, साथमा आफूले भोगेको जीवन, उभिएको माटो तथा मणिपुर गोर्खा समाजको सुगन्धसमेत कथाहरुमा प्रस्फुटित भएका छन् ।

“कथाहरुमा विशेष गरी ग्राम्सीको हेजेमनी, एल्थ्युसरको आइडियोलोजी, इलेइन शोवाल्टरका तात्विक पात्रहरु बढी भेटिन्छन् ।”, पुस्तकको भूमिकामा दीपक सुवेदी लेख्छन्, “विभिन्न कारणहरुले गर्दा पात्रहरु यहाँ मौन छन्, वर्षौंदेखि चलिआएको सामाजिक व्यवस्थालाई स्वीकारेका छन् । समाजमा बढेका अप्राकृत खुम्चाहरु सम्याउने प्रयत्नमा पाठकका विचारभाव परिवर्तित गर्ने यस्ता कथा सधैं आवश्यक हुन्छन् । त्यसैले अझ माझिएको लेखकीय यात्राका लागि कथाकार रोहित लामगादेलाई सिर्जनशील जीवनको शुभकामना ।”

पुस्तकलाई नयाँ दिल्लीस्थित अम्बर पब्लिकेशन हाउसले प्रकाशनमा ल्याएको हो । १६ कथा सङ्ग्रहित १ सय ५२ पृष्ठमा फैलिएको पुस्तकको मूल्य नेपाली बजारमा लागि नेरु. २ सय र भारतीय बजारका लागि भारु. १५० रहेको छ ।

 

२. गोलसिमल – पुष्प शर्मा

sagarmani mobile size

पुष्प शर्माको संकलन रहेको स्थानीय लोककथाहरुको सङ्ग्रह हो, गोलसिमल । यस सङ्ग्रहमा जम्मा १४ वटा लोककथाहरु सङ्ग्रहित छन् । यी कथाहरु विभिन्न जातजातिका स्मृतिमा बाँचेका कथाहरु हुन् । उदाहरणका लागि, सङ्ग्रहमा लेप्चा जातिको सामूहिक स्मृतिमा बाँचेको “स्वर्ग जाने सिँढी”को कथा (तालुम पार्ताम) लाई समावेश गरिएको छ ।

“दिदीका यस सङ्कलनमा परेका सबै कथाहरु वाचन विधाका छन् । दिदीको वाचन परिपाटीमा भाषाका माध्यमद्वारा नवीनता छाएको छ ।”, पुस्तकको भूमिकामा गोपालप्रसाद दाहाल लेख्छन्, “आधुनिक कथा लेखनको भाषाशैलीले लोककथा वाचनको शैलीलाई उछिनेको छ । एउटै लोककथालाई विभिन्न काल र स्थानका आधारमा वाचकहरुले आआफ्ना शैली दिन्छन् । शैलीका आधारमा लोकसाहित्य भएन र होइन भन्न सकिँदैन । लोकतत्त्व, स्वैरकल्पना, कथानक, कथ्य, चरित्र र पात्रहरुमा रुमल्लिएको हुन्छ ।”

पुस्तकलाई उपमा पब्लिकेसनले प्रकाशनमा ल्याएको हो । १ सय ३४ पृष्ठमा फैलिएको पुस्तकको मूल्य भारु. २ सय रहेको छ ।

 

३. फागुन ! तिमी फर्किआउनू – देविका मंग्राती राई

दार्जीलिङ निवासी देविका मंग्राती राईको कविताकृत हो, फागुन ! तिमी फर्किआउनू । यो राईको पहिलो कृति हो । सङ्ग्रहित कवितामा मनका भावना र जीवनका अनुभवहरुलाई सरल र अभिधात्मक शैलीद्वारा आशा, उमङ्ग, उज्यालो र उत्साहहरु संचारित गरिएको छ । साथै, कविताहरुमा पहाड विकास, प्रकृतिक प्रदुषण, सम्बन्धका विचलन, समाजका विसङ्गतिलगायतको चिन्ताहरु व्यक्त भएका छन् ।

“कविता भनेको चिन्ता हो, आशा हो, भ्रान्तिलाई खेद्ने एक मृगमरीचिकाको पछि कुद्ने कला हो । यसमा देविका सफल छिन् ।”, पुस्तकको भूमिकामा डा. गोविन्दराज भट्टराई लेख्छन्, “उनका कविता सरल छन्, साथै शुद्ध र शिष्ट भाषामा । उनका कविता ज्यादा त सांस्कृतिक परिवेशको चिन्ता र अतीतस्मृतिले बनिएका छन् । उनका कवितामा समकालीन स्वरका साथै परिवर्तनको विश्व चेत रहेको छ । यी पठनीय कविता तात्कालिक हुनुका साथै सर्वकालिक चिन्ताका कविता । कविताको मूल अभिप्राय यस्तै हो, सकेसम्म कलाले चिन्ता, आक्रोश, हर्ष, आनन्द, अतीत स्मृति आदि संवेगहरुलाई उचालेर अरुलाई सुनाउने र देखाउने प्रयत्न गर्छ ।”

पुस्तकलाई मणिपुरस्थित गोर्खा ज्योति प्रकाशन गृहले प्रकाशनमा ल्याएको हो । ५८ वटा कविता सङ्ग्रहित कृतिको मूल्य भारु. २ सय रुपियाँ रहेको छ ।

प्रतिक्रिया
Loading...