साहित्यपोस्ट
नेपाली भाषा र साहित्यको सम्पूर्ण पत्रिका
FIRST ANNIVERSARY

“अन्तर्राष्ट्रिय बाल तथा किशोर कविता प्रतियोगिता”मा पुरस्कृत कविताहरू

पढ्नुहाेस्, अन्तर्राष्ट्रिय बाल तथा किशोर कविता प्रतियोगितामा पुरस्कृत नेपालीतर्फ तीन र अङ्ग्रेजीतर्फ एक कविता

गैरआवासीय नेपाली सङ्घको भाषा, साहित्य, संस्कृति तथा सम्पदा समिति र अन्ताराष्ट्रिय नेपाली साहित्य समाज (अनेसास) को आयोजनामा गैरआवासीय नेपाली युवाहरूबिच सम्पन्न अन्तर्राष्ट्रिय बाल तथा किशोर कविता प्रतियोगितामा बङ्गालदेशकी इभान्जेलिना बल प्रथम भएकी छन् ।प्रथम बन्दै उनले एक हजार अमेरिकी डलरको हात पारेकी छिन् ।

त्यसैगरी जापानका अभिनव गिरी द्वितीय हुँदै पाँचसय अमेरिकी डलरको पुरस्कार जितेका छन् भने पोर्चुगलकी मानस्वी खरालले तीनसय डलरको तृतीय पुरस्कार जितेकी छिन् ।

अङ्ग्रेजी भाषाकाे कवितातर्फ अमेरिकाकी ओजस्वी पसछेले दुई सय डलरको पुरस्कार जितेकी छिन् ।

साठी जना प्रतियोगीमध्येबाट अन्तिम चरणमा पुगेका कविहरू अभिनव गिरी, अंशु सुवाल, आगत खरेल, इभान्जेलिना बल, गुन्जना न्यौपाने, गङ्गा फुयाल, मानस्वी खराल, समृद्धि नेपाल, सरला बाराकोटी, र सौगात पराजुली (नेपालीतर्फ) तथा ओजस्वी पसछे, मारिया अधिकारी र प्रेमा पौड्याल (अङ्ग्रेजीतर्फ) मध्येबाट नेपालीतर्फ प्रथम, द्वितीय र तृतीय तथा अङ्ग्रेजीतर्फ उत्कृष्ट एकलाई पुरस्कृत गरिएकाे हाे ।

पढ्नुहाेस्, अन्तर्राष्ट्रिय बाल तथा किशोर कविता प्रतियोगितामा पुरस्कृत नेपालीतर्फका तीन र अङ्ग्रेजीतर्फको एक कविताः

१. नेपाली भाषातर्फकाे प्रथम कविताः गाउँ फर्किने दिन

इभान्जेलिना बल (बङ्गलादेश) 

म गाउँ फर्किने दिन
शिर उठाएर
सेता बलेँसीधारा आँसु चुहाउँदै
निमग्न हाँसिरहेको हुनेछ
सेतै फुलेको हिमाल
बाटोहरुमा पर्खाइको घुम्टो ओढेर
पुरा उकालो चढिसकेको हुनेछ
उदास भुइँकुहिरो ।

धर्तीको छाती नै पटपटी फुट्ला झैं गरी
अविलम्ब लामो यात्रा हिँडिरहेको हुनेछ
निष्ठुरी खडेरी
र, बा’को अँध्यारो निधारबाट
एकाबिहानै निरन्तर ओर्लिसकेको हुनेछ
जम्मै पसिनाको बुँद ।

धेरै समयपछि
मेरो आफ्नै भित्री हृदयको किनारबाट
सुसेली हालेर बगिरहेको हुनेछ सङ्लो खोला
अनेक चेपहरुसँग लुकामारी खेल्दै
गाउँको पुछारसम्म
र,विस्मृतिको कालो पर्दाले छोपिएको हुनेछ
गाउँभरि पोतिएको मेरो नूतन अनुभूतिलाई
आकाश छुने सपनाको काँधमाथि टेकाएर ।

ती सल्लेरी पाखाहरुमा
बेला बखत गाउँ नै गुन्जाएर हिँड्ने चराहरु
यतिखेर गाइरहेका हुनेछन् कुनै विरही गीत
गरिबीको जीर्ण खुट्किलो चढेर
अक्षरहरुको फराकिलो पहाड उक्लिन
मुस्कुराउँंदै पाठशाला हिँडिरहेका हुनेछन्
कलिला पाइलाहरु
सुन्दर भविष्यको मूलबाटोमा ।

ओझेल परेको बेठेगान छायाजस्तो
परदेशी भुमिमा अलपत्र युवा पाखुरालाई
आफ्नै माटोमा खोपाउन श्रमको बीज
पर्खिरहेका हुनेछन् बर्षौदेखि
खिया लागेका कुटो र कोदालीहरुले ।

मैले आफ्नै आँगनमा टेकी नसक्दै
पहिलो पैताला
शून्यताको काखमाथि
आधा डुबेर टल्कदै तैरिरहेको हुनेछ
घरको मायालु जून
र,आमाको फरासिलो अनुहारभरि
आधा पोखिएर खेलिसकेकोे हुनेछ
उज्यालो नानी घाम ।

२. नेपाली भाषातर्फकाे द्वितीय कविताः अनागरिक जिन्दगी

अभिनव गिरी (जापान)

 

यो खण्डहर परिवेशमा
बाँचेको छु एउटा अनागरिक जिन्दगी
सिङ्गै धर्ती ओछ्याएर
धमिलो आकाश ओढ्छु
र विभेदको सिरानी लाएर
उकुसमुकुस निद्रा निदाउँछु ।

लाग्छ; आमाको गर्भमै
भोकले सङ्क्रमित थिएँ म
र हुर्कदा पनि भोकको सङ्क्रमणसँगै हुर्किए
फलस्वरूप आज बाध्य छु फगत् हेर्नलाई
निरन्तर बढिरहेको भोकमरीको आयतन ।

भरिन बाँकी नै छ जीवनको झोला
जहाँ भेटिन्छन् –
वतासको न्यून स्पर्श
चौतारीको मलिन शितलता
इन्द्रेणीको फिक्का रङ
र समयको कमजोर साथ ।

यतिबेला म पूरै रित्तो छु
मसँग भरोसाको पहाड छैन
पुग्नलाई निश्चित गन्तव्य छैन
र छैन धित मरुन्जेल रुने अधिकार पनि ।

सोचिरहेछु भोलि के होला ?
मेरो चिसो बस्तीमा न्यानो घाम उदाउला ?
हृदयको सगरमा समानताको बिजुली चम्किएला ?
मनको रित्तो बगँैचा सुन्दर फूलहरुले सजिएला ?
वा उज्यालो हुनु अगावै मलाई लिन
मेरो पैतालासम्मै आइपुग्ला मृत्युको बाटो ।

३. नेपाली भाषातर्फकाे तृतीय कविताः नयाँ वर्ष

मानस्वी खराल (पोर्चुगल)

भित्ताको काँटी
उसैको आधार पाएर
अन्तिम पानामा
आईपुगेको पात्रो
अनि कैयौँ
उतार चढाव
खुड्किला र सिँडिहरु
लड्दै र उठ्दै
नयाँ उल्लास भरेर
नविन उमङ्गको
एक थान
सुन्दर बिहानी
झुल्किँदैछ
ढल्कँदै गरेको
जूनलाई
साक्षी राखेर
नवविवाहिताझैँ
अनगिन्ती
आशा बोकेर
नयाँ जोश
उल्लासका साथ
स्वागत गर्नुछ
प्रीय नयाँ वर्षलाई ।

अदृश्य विषाणुलाई
परास्त गर्नुछ
भत्किएका दलान र
घर हरुलाई
टेका दिनुछ
पुछिएका सिउँदोमा
रङ्ग भरेर
वात्सल्यपूर्ण कोखमा
आशाको
किरण सिर्जिनुछ ।

कुइरोले
छोपेको जङ्गलमा
तेजिलो प्रकाश भर्दै
प्यारो नयाँ बर्ष
यसपाली
तिमीसँग
आशा धेरै छन् !
भित्ताको पाना बाहेक पनि
हर मानवजातिको
मुटुमा टासिनु छ
कहिले
ननिक्लिने गरी
अनि
मैले
धर्तीमातालाई
नयाँवर्षको
शुभकामना लेख्नु छ
समुन्द्रपारिको देशबाट
आशाको
शान्तिको
सभ्यताको
मानवीय संस्कारको
दीर्घायुको
र सुन्दर
अनि
उज्जवल भविष्यको
कामनासँगै
उर्ध्वगामी
चेतना जन्माएर
निरन्तर
अगाडि बढ्नु छ
जय होस,
प्रिय नयाँवर्ष!!

४. अङ्ग्रेजी भाषातर्फको पुरस्कृत कविताः

Title: The Artist

Poem by: Ojaswi Pasachhe, Wisconsin, USA,

Plain.
White.
Empty.

I stared at a blank canvas,
unsure of what to create.
Something bright and vivid,
Or something a bit more minimalistic?

At first, I was afraid
To reach out, to touch
The colors, the brushes, the paints.
At first, I was worried
Of making irreversible mistakes.

Yet, the feeling of dissatisfaction
Lingered in the back of my mind,
So I made my first stroke
On that blank canvas.

And, suddenly, I felt…

Free.

I began to paint with bright colors and dull ones,
With bold strokes and light strokes,
With happiness, with anger, and with sorrow.

Slowly, I poured my emotions, my soul,
Into this painting, into this canvas that was no longer empty.
Each stroke was a memory,
Each color an emotion,

And when I stood back
And stared at the canvas,
I saw hope.
I saw pain.
I saw love.

I became the artist, and the canvas was my life.

प्रतिक्रिया
Loading...