यौटा देशको

मनभरि कुरा खेलाएर

रमाउने गर्छु  म

कुन्नि किन

अचेल !

राजु “हिमांशु” (खरसाङ)

थाहा छ के हजुरलाई

म कुन देशको कुरा गर्दैछु ?

हजुर, म त्यही देशको कुरा गर्दैछु

जहाँको  राजा हो

प्रेम !

जहाँकी रानी हो

शान्ति!

हजुर, म त्यही देशको कुरा गर्दैछु

जहाँको न्यायालयमा

न्यायाधीश छन्

बुद्ध !

जहाँको अस्पतालमा

डाक्टर छन्

यीशु!

त्यहाँ सजाय भनेकै दया हो

त्यहाँ औषधि भनेकै माया हो।

हजुर, म त्यही देशको कुरा गर्दैछु

जहाँ राम र मोहम्मद

अँगालो मारेर

प्रेमकै कुरा गर्छन् ।

महावीर र लाओत्से

टाउको जोडेर

न्यायकै कुरा गर्छन् ।

जहाँ जराथुस्त्र र मोजेस

विषालु भाइरसहरू

धपाइरहेका हुन्छन्।

जहाँ दुखाइ र रुवाइ जाती पार्ने

उपायहरूको नतुरिने भण्डार छ ।

त्यहाँ रुपियाँ चल्दैन, माया चल्छ

त्यहाँ चापलुसी चल्दैन, सत्य चल्छ

त्यहाँ षड्यन्त्र चल्दैन, न्याय चल्छ

त्यहाँ आतङ्क चल्दैन, शान्ति चल्छ

त्यहाँ लोभको जाल बिछाउने

माकुराको  अस्तित्व नै छैन ।

असन्तुष्टिको बिगुल फुक्ने

दुई मुखे राजनीतिको त बास नै छैन ।

हजुर, म त्यही देशको कुरा गर्दैछु

यौटा त्यस्तै देशको

मनभरि कुरा खेलाएर

रमाउने गर्छु  म

कुन्नि किन

अचेल !