भरतपुर, १६ माघ ।

बिक्रमभक्त जोशीकृत कथासङ्ग्रह `चोभार ब्लुज´माथि अन्तर्क्रिया गरिएको छ । अक्षर समूह चितवनले डबली क्याफे भरतपुरमा कार्यक्रम आयोजना गरेको हो । साहित्यपोस्टले प्रकाशन गरेको पुस्तक चोभार ब्लुजको अन्तर्क्रिया कार्यक्रमका क्रममा कथाकार जोशी चितवन आएका हुन् ।

अक्षर समूहका अध्यक्ष रमेश प्रभातले `चोभार ब्लुज´कथासङ्ग्रहका सन्दर्भमा लेखक जोशी र प्राध्यापक उदय अधिकारीसँग संवाद चलाए । प्राध्यापक उदय अधिकारीले जोशीका कथाहरू निबन्धकै शैलीमा मात्रै नबाँधिएको बताए । `उहाँका कथाहरूमा बिबिधता छ, कथाहरू एउटै सूत्रमा छैनन्, केही कथाहरू औपन्यासिक शैलीमा पनि बाँधिएका छन्’, अधिकारीले भने । जोशीका कथामा यात्रासाहित्य पनि समेटिएको रमेश प्रभातले बताए ।

`सङ्ग्रहमा निबन्ध शैलीका कथाहरू छन्, यी मेरा निकथा हुन्´, कथाकार जोशीले भने । तीन वर्षको अन्तरालमा लेखिएका केही कथाहरूलाई संकलन गरेर किताबको रूपमा ल्याएको जोशीले बताए । `धेरै कथाहरू लेखेर छान्नेतिर लागिनँ, जति लेखें कृतिमा समेटिए´, उनले भने ।

कार्यक्रममा सहभागी भएका कथाकार जोशीका सहपाठी डाक्टर हेमनाथ घिमिरेले कथाकार जोशीको लेखनकारिताका बारेमा चर्चा गरेका थिए ।

पुस्तकमा १९ वटा कथाहरू छन् । १८ वटा कथा काठमाडौंकै परिवेश र वरिपरिका छन् भने एउटा कथा इन्डोनेसियाको बाली क्षेत्रलाई आधार बनाएर लेखिएको कथा सङ्ग्रहमा सङ्ग्रहित छ ।