लीलाध्वज थापा साहित्य  प्रतिष्ठानको मासिक रचना वाचन तथा स्रष्टा सम्मान शनिबार पृथ्वी जयन्ती विशेष कार्यक्रम मनाउँदै सम्पन्न गरियो ।

कार्यक्रममा साहित्यकार प्रा .डा. लक्ष्मणप्रसाद गौतमलाई  लीलाध्वज स्रष्टा सम्मानले सम्मानित‌ गरियो । उक्त सम्मान प्रतिष्ठानका अध्यक्ष विजयध्वज थापाले प्रदान गर्नुभयो।

सम्मानित हुनुभएका स्रष्टा गौतमले लीलाध्वज थापाले उपन्यास, नाटक, हांस्यव्यङ्ग्य, कविता आदि लेख्नु भएको र उहाँको उपन्यास संख्यात्मकभन्दा गुणात्मक भएको र उपन्यासले २०१४ सालमा नै मदन पुरस्कार पाएका त्यस्ता स्थापित स्रष्टाको नामको प्रतिष्ठानबाट सम्मानित हुँदा अत्यन्त खुशी लागेको बताउनुभयो ।

प्रतिष्ठानले हरेक महिना यस्तै राम्रो कार्यक्रम गर्ने गरेको सुन्दा  अत्यन्त खुशी लागेको कुरा व्यक्त गर्दै डा. गौतमले यसको निरन्तरताको कामना गर्नुभयो । साथै, सम्मान पुरस्कार भनेको ठूलो सानो नहुने बताउँदै श्रद्धाले गरिएका सबै सम्मान ठूलो हुने जनाउनुभयो ।

प्रतिष्ठानका अध्यक्ष विजयध्वज थापाको अध्यक्षतामा सम्पन्न सो कार्यक्रममा अग्रज साहित्यकार रामप्रसाद पन्तले कार्यक्रमका अतिथिहरूलाई स्वागत गर्दै सम्मानित हुनुभएका साहित्यकार प्रा. डा. गौतमका विषयमा प्रकाश पार्नुभएको थियो । उक्त कार्यक्रममा अध्यक्ष थापाले सम्मानित स्रष्टाले लामो समयदेखि नेपाली भाषा र साहित्यमा उल्लेखनीय सेवा गर्दै आउनुभएको जनाउनुभयो ।

कार्यक्रममा मुकुन्द न्यौपाने, रत्न विरही घिमिरे, विजयध्वज थापा, राजेन्द्र खनाल, रुद्र अधिकारी, उत्तम विचार, सुन्दरबहादुर खडका, लव खडका, कृष्णदेव रिमाल, वासुदेव गुरागाईं, जयराम विडारी, रूचि सत्याल, शान्ता पोख्रेल, दुर्गा अधिकारी भमरकोटे, तिलक लुइटेल, उषा केसी, प्रा . नारायणप्रसाद कट्टेल, शान्ति शर्मा, रवीन्द्र आशीष शैली, वासुदेव ठकुरी, राजेशमान केसी, नारायण नेपाल, प्रमोद भण्डारी, राजबाबु श्रेष्ठ सागर, टिएन भट्ट विश्वामित्र, तोया गौतमले आआफ्ना रचना वाचन गर्नुभएको थियो ।

सो कार्यक्रम स्रष्टा उत्तम विचारले सहजकर्ताको भूमिका आकर्षक ढङ्गले निर्वाह गर्नुभएको थियो ।

अन्त्यमा अध्यक्ष थापाले अग्रज स्रष्टाको सम्मान गर्ने अवसर पाउँदा आफू र संस्थासमेत सम्मानित भएको धारणा व्यक्त गर्दै हालसम्म त्रीहत्तर अग्रज तथा विशिष्ट स्रष्टालाई स्रष्टा सम्मानले सम्मानित गर्न पाउँदाको खुशी व्यक्त गर्नुका साथै उपस्थित  सम्पूर्ण स्रष्टाप्रति हार्दिक आभार व्यक्त गर्नुभयो । वाचन गरिएका  रचनाका कदर गर्दै कदरपत्रले सम्मान गरिएको थियो । उक्त कार्यक्रम चिल्ड्रेन मोडल स्कुल बालुवाटारमा भएको थियो ।

कार्यक्रमको शुरुमा राष्ट्रिय गान बजाएर कार्यक्रम शुरु गरिएको थियो । उक्त प्रतिष्ठान यशश्वी कवि तथा उपन्यासकार लीलाध्वज थापाको नाममा स्थापना भएको हो ।