२०७८ सालको  पवन आलोक नियात्रा पुरस्कार वरिष्ठ साहित्यकार डा. दामोदर पुडासैनी किशोरको नियात्रा सङ्ग्रह ग्रीष्मको नीलो बतासलाई प्रदान गरिएको छ ।  २०७८ मा प्रकाशित कृतिहरू मध्ये डा. पुडासैनीको  ग्रीष्मको नीलो बतास सर्वोत्कृष्ट ठहरिएकोले उहाँलाई काठमाडौँमा बिहिबार राजधानीमा आयोजित भव्य समारोहमा उहाँलाई नगद पुरस्कार रू २५०००। सहित दोसल्ला, शिरपोस र सम्मानपत्र समेत प्रदान गरियो ।  रेखा कँडेलद्वारा संस्थापित पवन आलोक नियात्रा पुरस्कार समर्पण समारोह नियात्रा समाज नेपालले आयोजना गरिएको थियो ।
कार्यक्रममा डा. दामोदर पुडासैनीलाई प्रमुख अतिथि धनश्याम राजकर्णीकारले  सम्मान पत्र  अर्पण गर्नुभएको थियो भने नियात्राकार पवन आलोकले नगद रु २५ हजार र दोसल्ला अर्पण गर्नुभएको थियो । सभाध्यक्ष प्रतीक ढकालले पवन आलोक पुरस्कार अँकित विशेष टोपि सहित सम्मान गर्नुभएको थियो ।
कार्यक्रममा उपस्थित वक्ताहरुले डा . दामोदर पुडासैनीको ग्रीष्मको नीलो बतास जस्तो सर्वोत्कृष्ट नियात्रा कृतिले पुरस्कार पाउँदा नियात्रा समाज नेपाल र पुरस्कार संस्थापक दुबैको गरिमा बढेको धारणा राख्नुभएको थियो ।
कार्यक्रमका वक्ताहरू श्रीओम श्रेष्ठ, महेश पौडेल, जय छाङ्छा, मोहन चापागाईं, चन्द्रप्रसाद भट्टराई र प्रतीक ढकालले डा. पुडासैनीले नियात्रा साहित्यलाई विशेष उचाइमा पुर्याउनुभएको धारणा व्यक्त गरेका थिए । नियात्राको नाममा सपाट बयान र व्यक्तिगत कुण्ठा लेख्नेहरूको भीडलाई पन्छाउँदै डा पुडासैनीले नियात्रालाई नवीन शैली र विषयको माध्यमद्वारा बिशेष स्थान कायम गर्नुभएको धारणासमेत उनीहरूले व्यक्त गर्नुभएको थियो ।
डा पुडासैनीको अर्को नियात्रा सङ्ग्रह डोल्पो ! ओ डोल्पो ! यही २०७९ सालमा साझाप्रकाशनले प्रकाशमा ल्याएको छ । प्रकाशनको दुई महिना अवधिमै अत्यन्त चर्चामा रहेको डोल्पो ! ओ डोल्पो ! सर्वाधिक बिक्रीको सूचिमा स्थान जमाउनसमेत सफल भएको छ ।