गए राति शुक्रबार ८:३० बजेबाट द पोएट आइडलले भोटिङ राउन्ड सुरु गरेको छ । भोटिङ राउन्ड सुरु भएको पहिलो प्रस्तुतिमा बुद्धिसागर प्रमुख अतिथि रहेका थिए ।

‘पोएट आइडल सञ्चालन भएकोमा आफू धेरै खुसी भएको र यो सबैको लागि बन्द नभएको एउटा खुल्ला ढोका हो,’ प्रतिक्रिया दिँदै अतिथि बुद्धिसागरले बताए ।

प्रत्येक प्रतियोगीहरूको प्रस्तुति हेरेसँगै बुद्धिसागरले भर्खरै प्रकाशित आफ्नो तेस्रो उपन्यास एक्लोबाट एउटा कविता सुनाएका थिए । गत मंसिरमा बजारमा आएको एक्लो अहिले देश विदेशमा घुमफिर गरिरहेको छ ।

गए राति टप १४ मध्ये समूह ए का प्रतियोगीहरूले गएको हप्ताभन्दा निकै राम्रो प्रस्तुति दिएको पाइयो । नाट्य शैलीदेखि अन्य विविध शैलीमा आफ्नो प्रस्तुति दिएका थिए । हिजोको प्रस्तुतिले धेरै दर्शक स्रोताहरूले बल्ल प्रतियोगी कविहरूमा साँच्चिकै कवित्व रहेको महसुस गर्न पाएका छन् ।

प्रस्तुति दिएसँगै आम दर्शकहरूलाई आफ्नो प्रस्तुति मन परेमा भोट गरिदिनुहुन अनुरोध गरेका छन् । ग्रुप ए का सात प्रतियोगीहरूमा मिल्सन राई, छविना लुङेली मगर, नीलम गुरुङ, अनुप न्यौपाने, गगन लिम्बु, युग सर्वनाम र पिंकी बोहोरा रहेका छन् ।

दर्शक स्रोताहरूले मोबाइलको प्ले स्टोरमा गई ओएसआर कनेक्ट एप डाउनलोड गरेर आफ्नो मनपर्ने प्रतियोगीहरूलाई भोट गरेर अघिल्लो राउन्डमा पुर्याउन सक्नुहुनेछ र थप अरु पनि प्रस्तुति हेर्न पाउनु हुनेछ ।