नेपाल स्रष्टा समाजले आफ्नो सोह्रौं स्थापना दिवसको अवसरमा कविद्वय समाजका संस्थापक अध्यक्ष चर्चित कवि शैलेन्द्र साकार र युवाकवि नवराज पराजुलीलाई सम्मान गरेको छ।

कार्यक्रमका प्रमुख अतिथि साहित्यिक पत्रकार नगेन्द्रराज शर्माले कवि शैलेन्द्र साकारलाई सम्मानपत्र समर्पण गर्नुभयो ।

त्यसैगरी प्रमुख अतिथि शर्माले सोही अवसरमा युवाकवि नवराज पराजुलीलाई ‘प्रसिद्ध कँडेल युवा स्रष्टा सम्मान २०७९’ समर्पण गर्नुभयो। ४० वर्षमुनिका स्रष्टालाई प्रदान गरिने सो सम्मानका साथ ११ हजार १११ रुपैयाँ नगद प्रदान गरिएको थियो।

उक्त पुरस्कार सीता कँडेल र चेतनाथ कँडेलले छोरा प्रसिद्ध कँडेलको सम्झनामा स्थापना गर्नुभएको हो ।

समाजले आफ्नो स्थापना दिवसको अवसरमा ‘दक्षिण एसियामा नेपाली साहित्य’ विषयमा विचार गोष्ठीसमेत आयोजना गरेको थियो। यसबारे समालोचक महेश पौड्याल र भीष्म उप्रेतीले आफ्ना धारणाहरू राख्नु भएको थियो।

कार्यक्रममा प्राडा अभि सुवेदीले साहित्यबाटै हामीले आफ्नो पहिचान कायम गर्नुपर्ने बताउनुभयो।

सो कार्यक्रममा पुरस्कृत कवि नवराज पराजुलीले मोक्ष शीर्षकको आफ्नो कविता वाचन गर्नुभएको थियो ।

कार्यक्रममा प्रमुख अतिथि नगेन्द्रराज शर्मा, पवन आलोक, श्रीओम श्रेष्ठ रोदन, चेतनाथ कँडेल, देविका तिमिल्सिना लगायतले बोल्नु भएको थियो ।

जमलस्थित राष्ट्रिय नाचघरको हरिप्रसाद रिमाल कक्षमा सम्पन्न कार्यक्रम समाजका अध्यक्ष श्रीओम श्रेष्ठ रोदनको अध्यक्षता र महासचिव देविका तिमिल्सिनाको सञ्चालनमा सम्पन्न भएको थियो।