काठमाडौँ, पुस ९ / शनिबार नेपाल स्रष्टा समाजले आयोजना गरेको एक कार्यक्रममा तीनवटा पुस्तकको एकसाथ लोकार्पण भएको छ । वरिष्ठ कवि तुलसी दिवसको प्रमुख आतिथ्यमा माधव विडारीको उपन्यास ‘अनन्त यात्रा’, रामचन्द्र दाहालको कवितासङ्ग्रह ‘सुजेरो’ र जिज्ञासु पौडेल तिलकको मुक्तकसङ्ग्रह ‘ज्वालामुखी’ लोकार्पित गरिएको हो ।

उक्त लोकार्पित पुस्तकहरूमाथि प्राडा सावित्री कक्षपति, प्राडा कृष्णप्रसाद दाहाल, प्राडा गोविन्दमानसिंह कार्की र डा.शान्तिमाया गिरीले समीक्षात्मक टिप्पणी गर्नुभएको थियो ।

कार्यक्रममा बागमती कलेजका अध्यक्ष रमेश सिटौला, समाजका सल्लाहकार चन्द्रप्रसाद भट्टराईले शुभकामना व्यक्त गर्नुभएको थियो ।

नेपाल स्रष्टा समाजका अध्यक्ष श्रीओम श्रेष्ठ ‘रोदन’को सभापतित्वमा भएको उक्त कार्यक्रममा सचिव प्रकाश घायल, मधु पाठक, लोकार्पित पुस्तकका लेखक माधव विडारी, रामचन्द्र दाहाल र जिज्ञासु पौडेल तिलकले मन्तव्य राख्नु भएको थियो ।