टीकापुर (कैलाली), पुस ९ / टीकापुर सरोकार समूहले कैलालीको टीकापुर क्षेत्रमा पठन संस्कृतिको प्रवर्द्धन गर्ने उद्देश्यले टीकापुर सामुदायिक पुस्तकालयमा स्वयं आई अध्ययन गर्ने महिनाभरिको एक उत्कृष्ट पाठकलाई रु. दश हजार नगद पुरस्कारसहित सम्मानपत्रले मंसिर महिनादेखि पुरस्कृत गर्न थालेको छ ।

आज टीकापुर सामुदायिक पुस्तकालयमा आयोजित एक विशेष कार्यक्रममा टीकापुर पोलिटेकनिक इन्सिट्युटका उपेन्द्र चौधरीलाई मंसिर २०७९ का लागि उत्कृष्ट पाठकको रु. दश हजार नगदसहित सम्मानपत्र प्रदान गरिएको छ ।

चौधरीलाई टीकापुर नगरपालिका वडा नम्बर १ का अध्यक्ष मोहन बिक र वरिष्ठ शिक्षाविद् यज्ञमूर्ति अर्यालले संयुक्त रुपमा पुरस्कार हस्तान्तरण गर्नु भयो ।

कार्यक्रममा टीकापुर सामुदायिक पुस्तकालयका अध्यक्ष ताराप्रसाद जोशी र टीकापुर सरोकार समूहका सचिव नवराज भट्टराईले पुरस्कारको औचित्यमाथि धारणा प्रस्तुत गर्नु भएको थियो ।

सरोकार समूहका सचिव नवराज भट्टराईका अनुसार पुस्तकालय र समूहको सहकार्यमा आगामी एक वर्षसम्म प्रत्येक महिना यो पुरस्कार प्रदान गरिनेछ ।

मंसिर २०७९ को पुरस्कार नेपाल अफ्रिका साहित्य समाजले प्रायोजन गरेको थियो ।