Chovar Blues Mobile Size

सुसेली साहित्यिक प्रतिष्ठान तथा हाम्रो लघुकथा पाठशालाको संयुक्त आयोजनामा शनिबार साहित्यकार शेखरकुमार श्रेष्ठका ‘छाता’ र ‘बोकाको खुसी’ दुई लघुकथासंग्रह विमोचन गरियो ।

दक्षिणकाली नगरपालिका-३ सेतीदेवी माविमा दक्षिणकाली नगरपालिकाका प्रमुख मोहन बस्नेत, वरिष्ठ आख्यानकार ध्रुव मधिकर्मी, लघुकथा समाज नेपालमा सदस्य रामकुमार पण्डित, हाम्रो लघुकथा पाठशालाका व्यवस्थापक सत्या अधिकारी, नमस्ते आधुनिक लघुकथा मञ्चका व्यवस्थापक शेखर अर्याल, लघुकथा सौन्दर्यका एडमिन श्रीराम राई, साहित्यकार कात्यायन, वीरेन्द्र बलामी, शान्ता तिम्सिना, दीपक लामिछाने, मधुसूदन घिमिरे, संगीता ढुंगाना दाहाल, गोमा लुइँटेल, लक्ष्मी पौडेलले संयुक्त रूपमा कृतिको विमोचन गर्नु भएको थियो ।

दक्षिणकाली नगरपालिकाका प्रमुख मोहन बस्नेतले साहित्यले जीवनलाई सार्थक तुल्याउने र समाजको समृद्धिका लागि महत्त्वपूर्ण भूमिका निर्वाह गर्ने भएको हुँदा नगरपालिकाको समृद्धिको लागि सुसेली साहित्य प्रतिष्ठानसित सहकार्य गर्दै जाने प्रतिबद्धता व्यक्त गर्नु भएको थियो ।

विमोचित दुवै कृतिबारे समीक्षक शेखर अर्यालले समीक्षात्मक टिप्पणी गर्नुभएको थियो । उहाँले श्रेष्ठको लघुकथामा सामाजिक यथार्थता, विकृति-विसंगतिविरुद्ध दरिलो प्रहार,सामाजिक चेतनाको पक्षपोषण आदि सशक्त रूपमा आएको बताउनुभयो ।

दीपक लामिछानेले श्रेष्ठको उक्त क्षेत्रमा अतुलनीय योगदान रहेकाले सहकार्य गर्दै जाने बताउनुभयो ।

उक्त कार्यक्रममा वरिष्ठ साहित्यकार ध्रुव मधिकर्मी, रामकुमार पण्डित, श्रीराम राईले कृतिकारलाई बधाई तथा शुभकामना दिनुभएको थियो ।

कार्यक्रममा कष्णकुमार श्रेष्ठ, विरेन मालाकार लगायतले विमोचित कृतिका लघुकथा वाचन गर्नुभएको थियो ।

कार्यक्रममा सुसेली साहित्यिक प्रतिष्ठानले दक्षिणकाली नगरपालिकाका साहित्यकार एवं लेखक चिनाउने पुस्तकका साथै फर्पिङ जन्मभूमि भएका वरिष्ठ साहित्यकार किशोर पहाडीको जीवनी र कृतित्वबारे पुस्तक प्रकाशन गर्ने योजना रहेको बताउनुभयो ।

कार्यक्रममा शान्ता तिम्सिनाले हाम्रो लघुकथा पाठशालाकी संस्थापक लता केसीबाट पठाइएको शुभकामना वाचन गर्नुभएको थियो ।

कार्यक्रममा प्रतिष्ठानका सदस्य रमेश बलामीले स्वागत मन्तव्य राखेका थिए। नेपाली लघुकथाकार पूर्णप्रसाद ब्राह्मणको तस्वीरमा माल्यार्पण, लघुकथा गान बजाएर तथा राष्टिय गान गाएर शुरू भएको उक्त कार्यक्रममा स्थानीय समाजसेवी, साहित्यकार, विद्यार्थीको उपस्थिति रहेको थियो।

उक्त कार्यक्रम प्रतिष्ठानका अध्यक्ष आवेश मिश्रको अध्यक्षता र सविता केसीको उदघोषणमा सम्पन्न भएको थियो।