ज्याक लण्डनको उपन्यास महसुर ह्वाइटफ्याङ नेपाली भाषामा प्रकाशित भएको छ। उनको जन्म सन् १८७६ मा अमेरिकाको सनफ्रान्सिस्कोमा भएको थियो भने मृत्यु सन् १९१६ मा भएको थियो। ज्याक लण्डन अमेरीकी साहित्यकार, पत्रकार र समाजसेवी थिए। ज्याक लण्डनको “The Call of the Wild, Tales of the North र The Scarlet Plague लगायतका उपन्यासहरु विश्व प्रसिद्ध रहेका छन्। ज्याक लण्डन आफ्नो साहित्यिक कृति मार्फत अन्तर्राष्ट्रिय ख्याती कमाउने पहिलो अमेरिकी लेखक थिए।

महसुर ह्वाइटफ्याङ उपन्यास नेपाली भाषामा प्रकाशमणि दाहालले अनुवाद गरेका हुन्। उनले यसभन्दा पहिला महान् जादुगर ओज (The Wizard of Oz) नेपाली भाषामा अनुवाद गरेका थिए।
ह्वाइटफ्याङ एउटा ब्वाँसाको कथा हो। यो कथा उन्नाइसौँ शताब्दीतिर क्यानडाको उत्तरपूर्वी युकोन क्षेत्रबाट सुरु भएर संयुक्त राज्य अमेरिकाको सनफ्रान्सिस्कोमा समाप्त हुन्छ।

यस उपन्यासमा एउटा जङ्गली ब्वाँसाको छाउराले जन्मेका दिनदेखि अनेक हन्डर खाँदै प्राकृतिक र मानवीय जीवन व्यवहारबारे सिक्दै गएको कुरा प्रस्तुत छ।

उपन्यासमा प्रारम्भको अज्ञानी, निरीह, र रिसाह स्वाभावको ह्वाइटफ्याङ हुर्कँदै जाँदा संयमी, समझदार, इमान्दार हुन पुगेको वर्णन छ। उसको सिकाइमा जागरुकता, कहिल्यै नगल्ने आत्मविश्वास, गहिरो अवलोकन, स्थिति परीक्षण, निष्कर्ष, निर्णय, र सिकाइको निरन्तरता सम्पूर्ण मानिसका लागि प्रेरणादायी छन्।

यस उपन्यासमा लेखकले सिकाइका धेरै पाटाहरु केलाउने प्रयास गरेका छन्, जसमध्येको प्रमुख पाटो समाज हो। लेखकले जनावर र मानिस दुबैको सिकाइको प्रमुख आधार समाज हो भन्ने कुरालाई जोडदार रुपमा प्रस्तुत गरेका छन्। वी रिडले प्रकाशनमा ल्याएको यस उपन्यास पाठकहरुको लागि पठनीय र कल्पनाशील हुनुका साथै कुनै बिषयलाई हेर्ने पृथक दृष्टिकोण प्रदान गर्नेछ। २८८ पृष्ठको “महसुर ह्वाइटफ्याङ” को मुल्य चार सय पचास रुपैँया रहेको छ।