सिक्किमकी कवि जीविका अश्रुद्वारा लिखित ‘भोकको भाइरस’ कवितासङ्ग्रह विराटनगरमा विचोचन गरिएको छ ।

विराटनगरस्थित राष्ट्रसेवक सहकारी संस्थाले शुक्रबार आयोजना गरेको कार्यक्रममा साहित्यकार सरला चापागाईं, रामबाबु दाहाल, आयोजक संस्थाका अध्यक्ष जीवन काफ्लेलगायतले संयुक्त रूपमा कवितासङ्ग्रह विमोचन गरेका थिए । विमोचित कृतिका विषयमा डा. विशालबाबु बस्नेत र डा. लक्ष्मण खनालले समीक्षा गरे । सङ्ग्रहमा विभिन्न शीर्षकका ४५ वटा कविता सङ्ग्रहित छन् ।

सोही अवसरमा आयोजित सिर्जना वाचनमा कवि सुमन पोखरेल, सीमा आभास, भरत गुरागाईं, मीनकुमार नवोदित, चूडामणि नेपाल ‘अकिञ्चन’, शुभलक्ष्मी लम्साल, रोहिणी रसिक, हेमन्त निरौला, लक्ष्मी स्मृति, जमुना पौडेल, सविना श्रेष्ठ, अम्विका खरेल, सुमन गुरागाईं, शारदा कार्की, राधा भट्टराई, भवानी पोखरेल, लक्ष्मी स्मृति, अजिता प्रधान, मञ्जु घिमिरे दाहाल, लक्ष्मी रायमाझीलगायत दुई दर्जनभन्दा बढीले आ-आफ्ना सिर्जना प्रस्तुत गरेका थिए ।

सहकारीले विगत साढे दुई वर्षदेखि हरेक महिनाको दोस्रो शुक्रबार सिर्जना वाचन गर्दै आएको छ । शुक्रबार ३० औँ शृङ्खला सम्पन्न भएको छ ।