फ्रान्ज काफ्काको विश्वप्रसिद्ध कृति ‘द मेटामोर्फसिस’को नेपाली अनुवाद चित्रसहित अन्तर्राष्ट्रिय संस्करणमा आएको छ । रामचन्द्र के.सी.ले अनुवाद गरेको काफ्काको यो उपन्यासिका आजभन्दा १०५ वर्षअगाडि पहिलोपटक छापिएको थियो ।

प्रिन्ट अंन डिमाण्डअन्तर्गत प्रकाशन भएको यो पुस्तक अहिलेलाई अमेजन र वार्न्स एण्ड नोबेलमार्फत् अर्डर गर्न सकिन्छ भने यसको ईबुक भर्सन एप्पल बुक्समार्फत् किन्न सकिन्छ । अमेरिकास्थित रिस्टार्ट पब्लिसिङ कम्पनीद्वारा प्रकाशित यो पुस्तक अमेरिकासँगै बेलायत, अस्ट्रेलिया, ब्राजिल, जर्मनी, भारत, जापान, इटाली, क्यानाडा, स्पेन लगायतका देशमा रहेका नेपालीले पनि पुस्तक किन्न सक्नेछन् ।

‘मेटामोर्फसिस’लाई नेपाली बजारका लागि भने यसअघि नै बुकहिलले हार्ड कभरमा छापिसकेको छ ।

पेस युनिभर्सिटी, न्यूयोर्कबाट ‘पुस्तक प्रकाशन’मा मास्टर्स गरेका के.सी.का अनुसार नेपाली साहित्यका लागि पहिलो चुनौती भनेको मूलधारका वितरण प्रणालीमा छिर्न नसक्नु हो । “सम्पूर्ण पुस्तक बिक्रीको झन्नै आधा हिस्सा ओगटेको अमेजनको आफ्नै प्रिन्ट-अन्-डिमाण्ड डिभिजन छ तर यसमा जम्मा २०-२२ भाषा मात्र समावेश छन् । जसमा हिन्दी पनि समेटिएको छ । अमेजनले उसको लिस्टमा भाषा थप्दै जाने क्रममा नेपाली भाषा पनि समावेश गरेपछि भने नेपाली पुस्तक अमेजनको प्रिन्ट र ईबुक डिभिजनमार्फत् विश्वबजारमा पुर्याउन सहज होला ।”

१२२ पृष्ठको मेटामोर्फसिसमा ८० वटा भन्दा बढी चित्र छन् । प्रिन्ट पुस्तकको मूल्य १५.९९ र ईबुकको ९.९९ डलर राखिएको छ ।

पुस्तक: मेटामोर्फसिस्
लेखक: फ्रान्ज काफ्का
अनुवादक: रामचन्द्र के. सी.
चित्र: संदिपन सन्त्रा
पृष्ठ: १२२
चित्र संख्या: ८० +
प्रकाशक: रिस्टार्ट पब्लिशिंग
मूल्य: $१५.९९ (प्रिन्ट) $९.९९ ई-बुक