धवलागिरि साहित्य प्रतिष्ठानबाट हरेक वर्ष प्रदान गर्दै आएको बम सरस्वती स्मृति पुरस्कार यस वर्ष साहित्यिकार सूर्यप्रसाद लाकोजूलाई प्रदान गरिएको छ । साथै काजी रोशन साहित्यिक पुरस्कारबाट डा. षडानन्द पौडेल पुरस्कृत हुनुभएको छ ।

नेपाली भाषा र साहित्यको श्रीवृद्धि, साहित्यिक संगठन, साहित्यिक पत्रकारिताको माध्यमबाट समाजलाई चेतना प्रदान गर्दै साहित्यिक गतिविधिमा निरन्तर लागिरहेका स्रष्टालाई प्रदान गर्दै आएको उक्त नगद रू. दश हजार सहितको बम सरस्वती स्मृति पुरस्कार यस वर्ष लाकोजूलाई प्रदान गरेको हो ।

त्यस्तै काजी रोशन काव्य साधना कृतिका लागि काजी रोशन साहित्यिक पुरस्कार पौडेललाई प्रदान गरिएको हो । उक्त पुरस्कारको राशी नगद रू. पन्ध्र हजार रहेको छ । दुवैलाई सम्मानपत्र, दोसल्ला र नगदसहित प्रमुख डा. रामप्रसाद उपाध्याय र धवलागिरि साहित्य प्रतिष्ठानका अध्यक्ष काजी रोशनले पुरस्कार समर्पण गरिएको थियो ।

डा. रामप्रसाद उपाध्यायको प्रमुख आतिथ्यतामा सम्पन्न सो कार्यक्रममा राधिका कल्पितको बरफका कोइला नामक कृतिको विमोचन पनि गरिएको थियो । कार्यक्रममा डा. रामप्रसाद उपाध्याय, साहित्यकार कानी रोशन, सूर्यप्रसाद लाकोजू, षडानन्द पौडेल, गायक विजयराम कर्माचार्य, राधिका कल्पित, गणनाथ पौडेल, चन्द्रबहादुर लामिछाने लगायतले आआफ्ना मन्तव्य व्यक्त गर्नुभएको थियो।