Chovar Blues Mobile Size

नेपाल स्रष्टा समाजले प्रत्येक वर्ष प्रदान गर्दै आएको सुभद्रा विश्वराज स्रष्टा सम्मान शास्त्रीय शैलीमा काव्य सिर्जना गरी नेपाली साहित्यमा योगदान पुर्याउने वरिष्ठ साहित्यकार रमेश खकुरेललाई प्रदान गर्ने निर्णय गरेको छ । ४० बढी छन्दमा कविता लेख्ने कुशल, सिद्धहस्त छन्दकवि खकुरेलका दर्जन बढी कविता, खण्डकाव्य, महाकाव्य, यात्राकाव्य सङ्ग्रहहरू प्रकाशित छन् । १० हजार राशिबाट शुरु भएको यो सम्मान स्थापनाको चौथो वर्षमा नै २१,१११ रूपैयाँ पुर्याइएको छ । सुभद्रा विश्वराज स्रष्टा सम्मान समाजका वर्तमान अध्यक्ष विधान आचार्यले स्थापना गरेका हुन् ।

त्यस्तै प्रसिद्ध कँडेल स्मृति राष्ट्रिय युवा सम्मान वर्ष २०७७ का लागि साहित्यकार अनुपम रोशीलाई प्रदान गर्ने निर्णय गरेको छ । उपन्यास, कथा, निवन्ध, गजल, कविता आदि विषयमा कलम चलाउने रोशीले युवा वर्ष मोति, उत्कृष्ट निवन्ध, नूर गङ्गा आदि पुरस्कारबाट पुरस्कृत भइसकेकी छन् । यस सम्मानको राशि ११,१११ रूपैयाँ रहेको छ । प्रसिद्ध कँडेल स्मृति राष्ट्रिय युवा सम्मान समाजका पूर्व महासचिव चेतनाथ कणेल र निजकी श्रीमती सीता कँडेलले स्थापना गरेका हुन् ।

समाजको पुस ११ गते हुने साधारण सभाबाट उल्लेखित सम्मान गरिने नेपाल स्रष्टा समाजले जनाएको छ । नेपाल स्रष्टा समाजले प्रत्येक वर्ष पाँच प्रकारका सम्मान प्रदान गर्दै आएको छ ।

विगत ११ वर्षदेखि समाजसुधारक योगमाया न्यौपानेका नाममा समाजका पूर्व अध्यक्ष तथा संरक्षक पवन आलोक लगायतले स्थापना गरेको योगमाया राष्ट्रिय सम्मान, विगत तीन वर्षदेखि राजेश न्यौपाने र केदार नेउपानेले स्थापना गरेको योगमाया न्यौपाने अभियन्ता राष्ट्रिय सम्मान तथा वर्तमान महासचिव पुष्पा खनालले स्थापना गरेको दमन्ता खनाल स्मृति नारीस्रष्टा सम्मान पनि समाजले प्रदान गर्दै आएको छ ।