काठमाडौँ । पाटन संयुक्त क्याम्पस, नेपाली विभागले सञ्चालन गर्दै आएको ‘संज्ञान विमर्श’ को चौथो शृङ्खला मङ्सिर १२ गते शुक्रबार सम्पन्न भएको छ। यसपटकको विमर्श कथाकार राजबाबु श्रेष्ठ सागर को नवीन कथाकृति ‘फिर्दोसको साँचो’ लाई केन्द्रमा राखेर गरिएको थियो।

विभागाध्यक्ष सहप्रा. माधव उपाध्यायको सभाध्यक्षतामा सम्पन्न कार्यक्रममा विभागका उपप्राध्यापक डा. शोभा ढुङ्गानाले कृतिमाथि समालोचकीय प्रस्तुति दिँदै श्रेष्ठका कथाहरू आध्यात्मिक जीवन–दर्शनमा आधारित रहेको टिप्पणी गर्नुभयाे । कथामा वर्गीय जटिलता सशक्त रूपमा व्यक्त भएको र कथाकारको प्रस्तुति अझ परिष्कृत हुँदै गए आगामी यात्रा धेरै समृद्ध बन्ने उहाँकाे अभिमत थियो।

अर्का समालोचक उपप्रा. विष्णु ज्ञवालीले श्रेष्ठले अन्य साहित्यकारले नछोएका विषय–द्वीपहरू समातेर कथा लेख्ने गरेको बताउनुभयाे । उहाँकाे अनुसार, कृतिका कथा मूलतः ‘मान्छे’ केन्द्रित छन् र प्रयोगशीलता श्रेष्ठको पहिचानको रूपमा उदाएका छन्।

कार्यक्रममा शुभकामना व्यक्त गर्दै उपप्रा. डा. जीवन श्रेष्ठले नेपाली कथालेखनमा श्रेष्ठको स्थान पहिचान गर्नु समालोचकको दायित्व रहेको बताउनुभयाे । उपप्रा. डा. महानन्द जोशीले कथाको सैद्धान्तिक आधार मजबुत बनाउन सके कथाकारको शिल्पिकला थप दृढ हुने धारणा राख्नुभयाे ।
उपप्रा. डा. सारदा लामिछानेले मिश्रित चेतनाका कथाहरू लिएर श्रेष्ठ अघि बढिरहेको उल्लेख गर्दै उहाँको कथाशक्ति औंल्याउनुभयाे । उपप्रा. चतुर्भुज केवरतले अर्थका तहभित्र प्रवेश गरी कृतिको बोध गर्न पाठक स्वतन्त्र रहेको टिप्पणी गर्नुभयाे ।

कार्यक्रमका सभाध्यक्ष तथा विभाग प्रमुख उपाध्यायले ‘संज्ञान विमर्श’लाई नियमित बनाउँदै प्रत्येक महिनाको अन्तिम शुक्रबार साहित्यिक कृति, स्रष्टा तथा विचारकहरूको विषयमा गम्भीर बहस सञ्चालन गर्ने योजना सार्वजनिक गर्नुभयाे ।

विभागका प्राध्यापक, स्नातक तथा स्नातकोत्तर तहका विद्यार्थीहरूको उल्लेखनीय उपस्थिति रहेको यो विमर्श कार्यक्रम नेपाली कथासाहित्यका नयाँ दृष्टि र बहसको थलोका रूपमा स्थापित हुँदै गएको छ।