टोकियो, जापान । अन्तर्राष्ट्रिय नेपाली साहित्य समाज (अनेसास) जापान च्याप्टर र साहित्यपोस्टको संयुक्त आयोजनामा ११७ औँ लक्ष्मी जयन्तीको अवसरमा विशेष साहित्यिक कार्यक्रम सम्पन्न हुने भएको छ । जापानको टोकियो शहरमा हुने उक्त कार्यक्रममा साहित्यकार तथा साहित्यपोस्टका प्रधानसम्पादक अश्विनी कोइरालाको प्रमुख आतिथ्यता रहनेछ ।

कार्यक्रममा लक्ष्मी जयन्ती मनाउँदै साहित्यपोस्ट एपको औपचारिक उद्घाटन गरिनेछ । नेपाली साहित्यलाई डिजिटल माध्यमबाट विश्वभर फैलाउने उद्देश्यले विकसित गरिएको साहित्यपोस्ट एप जापानमा पनि औपचारिक रूपमा प्रस्तुत गरिनेछ ।

महाकवि लक्ष्मीप्रसाद देवकोटाको जन्मजयन्तिलाई अवसर बनाएर जापान जानु साहित्यपोस्ट तथा समग्र नेपाली साहित्यको संवद्र्धनका महत्त्वपूर्ण कदम रहने प्रधानसम्पादक कोइरालाले बताउनुभयो ।

‘‘अन्तर्राष्ट्रिय नेपाली साहित्य समाज, जापान च्याप्टरले नेपाली भाषा, साहित्य, संस्कृति र कलालको एकमात्र (इ) दैनिक साहित्यपोस्टलाई स्थापना कालदेखि सहयोग र सहकार्य गर्दै आएको छ । समाजका दुई अध्यक्षहरु पत्रिकाका संरक्षक हुनुले पनि यो कुराको पुष्टि गर्छ ।’’, कोइरालाले भन्नुभयो, ‘‘यो सहकार्य संस्थाका सबै जसो च्याप्टरसम्म फैलिएको छ । त्यसमा पनि जापान च्याप्टरसँगको सहकार्य अझै नवीन, सिर्जनशील र अझै बढी व्यवसायिक हुँदै गएको छ । जापान च्याप्टरको यो सक्रियता र सहयोगलाई साहित्यपोस्ट परिवारले हृदयभरि सँगालेर राखेको छ ।’’

साथै, कोइरालाले आगामी दिनमा यो सहकार्य जारी रहने अपेक्षा राख्दै जापान च्याप्टरले देखाएको बाटोमा अनेसासका सबै च्याप्टरको आँखा पर्ने विश्वास व्यक्त गर्नुभयो ।

साहित्यपोस्ट एपमा एक हजारभन्दा धेरै नेपाली तथा अनूदित पुस्तक तथा श्रव्य–पुस्तक उपलब्ध छन् । साहित्यपोस्टको वार्षिक ग्राहक हुन् डायस्पोराका लागि वार्षिक शुल्क एक सय अमेरिकी डलर रहेको छ । कार्यक्रमका दिन ५ हजार जापानिज यानमा साहित्यपोस्टको वार्षिक सदस्यता लिन सकिने छ ।

कार्यक्रममा खुला रचना वाचन पनि गरिनेछ । सहभागी स्रष्टाहरूले आफ्ना कविता, गीत तथा गजल गर्न सक्नेछन् । त्यस्तै, सहभागीहरूबीच स्वागत तथा अन्तरक्रिया कार्यक्रम, विचार आदानप्रदान तथा साहित्यिक संवाद पनि गरिनेछ।

कार्यक्रम आगामी अक्टोबर २६ तारिख, आइतबारका दिन शिनओकुबोस्थित सोलमारी हलमा दिउँसो १२:३० बजेबाट शुरु हुनेछ । कार्यक्रममा जापानमा रहेका नेपाली साहित्यप्रेमी, साहित्यकार, पत्रकार तथा समाजसेवीहरूको गरिमामय उपस्थिति रहने अपेक्षा गरिएको छ ।