काठमाडौँ । प्रज्ञाभवन, कमलादीमा कवि एवम् आख्यानकार प्रोल्लास सिन्धुलीयको नवीनतम कथासङ्ग्रह ‘बागबजार बोल्दैन’ माथि  परिचर्चा तथा संवाद कार्यक्रम सम्पन्न भएको छ।

कार्यक्रममा साहित्यकारहरूले पुस्तकका विषयवस्तु र सिन्धुलीयको लेखन शैलीमाथि गहन छलफल गर्नुभएकाे थियाे । परिचर्चामा कवि एवम् समालोचक आर.एम. डङ्गोल, समालोचक अनुपमा रेग्मी र कथाकार पवित्रा अधिकारीले मुख्य वक्ताको भूमिका निर्वाह गर्नुभएकाे थियाे भने कवि एवम् नियात्राकार रञ्जु दाहालले कार्यक्रमको सहजीकरण गर्नुभएकाे थियाे ।

कार्यक्रममा साहित्यकार रवि प्राञ्जल, कथाकार अमोददेव भट्टराई, भुँडीपुराण प्रकाशनका अध्यक्ष केशव पराजुली, सम्पादक लक्ष्मी भट्टराई र कथाकार एवम् मुक्तककार प्रकाश बस्नेत गफाडीले पनि आ–आफ्ना धारणा राख्दै पुस्तक तथा लेखकको व्यक्तित्वको बारेमा प्रकाश पार्नुभएकाे थियाे । उहाँहरूले ‘बागबजार बोल्दैन’ मा समेटिएका कथाहरूको शैली, विषयवस्तु र समग्र साहित्यिक योगदानको विश्लेषण गर्नुभएकाे थियाे ।

२० वटा कथा समावेश ‘बागबजार बोल्दैन’ भुँडीपुराण प्रकाशनबाट बजारमा आएको छ। २ सय ३२ पृष्ठको यस पुस्तकको मूल्य ४ सय ७५ रुपैयाँ तोकिएको छ। परिचर्चा कार्यक्रमले सिन्धुलीयको कथा लेखनलाई थप उचाइमा पुर्‍याउन सहयोग पुर्‍याएको सहभागीहरूले बताउनुभएकाे छ । पुस्तकले पाठकहरूमाझ राम्रो चर्चा पाउने अपेक्षा गरिएको छ।