काठमाडौं । अन्तर्राष्ट्रिय श्रमिक दिवसको अवसरमा वर्तमान कविता समूहले आयोजना गरेको ‘श्रम, श्रमिक विशेष कविता वाचन’ कार्यक्रमले श्रमिक वर्गको जीवन, संघर्ष र गरिमा उजागर गर्दै साहित्यिक क्षेत्रमा एउटा सशक्त सन्देश प्रवाह गरेको छ।

काठमाडौंको मन्डिखाटारस्थित युरेसियन स्कूलमा सम्पन्न कार्यक्रममा १२ जना समकालीन कविहरूले आ–आफ्ना सिर्जना प्रस्तुत गर्नुभएको थियो ।

कार्यक्रमको सुरुवात कवि विश्व सिग्देलको ‘जुस पसलमा’ कविताबाट भएको थियो, जसमा एक युवकको मौन सहनशीलता र आर्थिक शोषणलाई मार्मिक रूपमा चित्रण गरिएको थियो। त्यसपछि चन्द्रबहादुर लामाको ‘श्रम दिवसमा’ कविताले श्रमिकको जीवनलाई जीवन्त रूपमा उतारेर श्रम दिवसको गहिरो भावनात्मक सन्देश प्रवाह गरेको थियो। सञ्जय सुमनको ‘पसिना’ ले पसिनालाई श्रम र धैर्यको अमूल्य प्रतीकको रूपमा प्रस्तुत गरेको थियो भने रमी प्रिया (रमी श्रेष्ठ) को ‘मानिस र पर्खाल’ ले श्रमिक वर्गले भोग्ने मानसिक र सामाजिक पर्खालहरूलाई उजागर गरेको थियो।

तीर्थराज भट्टराईको ‘गिट्टी कुट्ने आमाको याचना’ ले गिट्टी कुटेर जीविका चलाउने आमाको पीडा र परिवर्तनप्रतिको करुण पुकारलाई मार्मिक रूपमा प्रस्तुत गरेको थियो। दिलकुमारी डंगोलको ‘सेतो एप्रोन’ ले सेवा र स्वास्थ्य पेशामा क्रियाशील महिलाहरूको संवेदनशील संघर्ष उजागर गरेको थियो भने नवराज घिमिरेको ‘भुइँमान्छे’ ले समाजको पिँधमा रहेका उपेक्षित श्रमिकहरूको कथा सुनाएको थियो।

धीरकुमार श्रेष्ठको ‘गरीब दासको कथा’ ले एक सेवकको मौन पीडा र वफादारीलाई सरल भाषामा व्यक्त गरेको थियो। सुरेश गाँउलेको ‘ए भारिया दाइ’ ले भारी बोक्ने मजदुरको शारीरिक र भावनात्मक पीडालाई उजागर गरेको थियो भने केशव सिलवालको ‘जुठो भाँडा बटुल्दै एउटी महिला’ ले जात, वर्ग र लिङ्गको विभेदमा जीवन गुजार्ने महिलाको पीडालाई देखाएको थियो।

अभय श्रेष्ठको ‘सुकुनाराको पवित्र मन्दिर’ ले श्रमिकको शरीरलाई श्रमको पवित्र मन्दिरको रूपमा प्रस्तुत गरेको थियो भने ईश्वर थोकरले ‘तिम्रो नाम’ शीर्षकको कविता प्रस्तुत गर्नुभएको थियो।

कार्यक्रममा प्रस्तुत कविताहरूले सामाजिक असमानता, आर्थिक कष्ट र श्रमिकहरूको मौन सहनशीलता तथा जुझारूपनलाई संवेदनशील रूपमा चित्रण गरेका थिए। वर्तमान कविता समूहको यस पहलले श्रमको गरिमा र श्रमिकका जीवनकथाहरूलाई प्रकाशमा ल्याउने सशक्त प्रयास गरेको छ र साहित्य सामाजिक न्याय, सहानुभूति र चेतनाको माध्यम बन्न सक्ने कुरा पुष्टि गरेको छ।