कवि तथा गजलकार असीम सागरको पछिल्लो कविता कृति ‘क’ बजारमा आएको छ । फाइनप्रिन्टले उक्त कविता सङ्ग्रहलाई प्रकाशन गरेको हो ।

नेपाली साहित्य क्षेत्रमा असीमको यस कृतिको चर्चा धेरै अघिदेखि भए पनि प्रकाशनमा आइहालेको थिएन । अन्ततः फाइनप्रिन्ट असोज १ गतेबाट असीमको क लाई बजारमा पठाएको जनाएको छ ।

२०२८ सालमा अर्घाखाँचीमा जन्मिएका कवि असीमले साहित्यिक तथा दैनिक जीवनयापनका लागि संघर्ष राजधानीलाई नै धरातल बनाएर गर्दै आइरहेका छन् । साहित्य लेखनका अलवा उनी तरकारी व्यावसायमा छन् ।

असीमका यसअघि जुन पोखिएको रात (गजल सङ्ग्रह), अस्तित्वका आवाजहरु (गजल सङ्ग्रह), स्वर्गको सपना (एकल गजल एल्बम) प्रकाशित छन् । गलज लेखनबाट कवितातर्फ आफ्नो बलियो उपस्थिति जनाएका असीमको ‘क’ पहिलो कविता सङ्ग्रह हो ।