धनकुटा ।  काेशी प्रदेशकै लोकप्रिय डिजिटल पत्रिका प्रदेश खबरले स्थापना दिवसको अवसरमा साहित्य  विधा तर्फ प्रतिभावान् साहित्यकार झमक घिमिरेलाई  ‘कोशी एक्सिलेन्स अवार्ड २०८१’  उहाँको घरमै पुगेर प्रदान गरेको छ ।

फागुन ७ गते इटहरीस्थित सोल्टी वेस्टेन्डमा भएको समारोहमा प्रमुख अतिथि कोशी प्रदेशका मुख्यमन्त्री हिक्मत कुमार कार्कीले उक्त अवार्ड प्रदान गर्ने कार्यक्रम तय भए पनि साहित्यकार घिमिरे स्वास्थ्य अवस्थाका कारण उपस्थित हुन सक्नुभएन । सो अवार्ड उहाँको अनुपस्थितिमा  शिक्षा सेवी साहित्यकार लेखनाथ घिमिरेले ग्रहण गर्नुभएको थियो  ।

आइतबार साहित्यकार घिमिरेको घरमै पुगेर उक्त अवार्ड झमक घिमिरे प्रतिष्ठानका अध्यक्ष गोपाल गुरागाईँमार्फत हस्तान्तरण  गरिएको  प्रदेश खबरका अध्यक्ष पवन अधिकारीले जानकारी गराउनुभयो । सो कार्यक्रममा पत्रकार महासङ्घ धनकुटाका अध्यक्ष विदुर खवास,नेपाल प्रेस युनियनका कोशी प्रदेश महासचिव सन्जिव वाग्ले, प्रेस युनियन धनकुटाका अध्यक्ष बिनोद घिमिरे लगायतको उपस्थिति रहेको थियो ।

प्रदेश खबर डटकमको दोस्रो वार्षिकोत्सवको अवसरमा आयोजना गरिएको ‘कोशी एक्सिलेन्स अवार्ड’  १३ विधाका उत्कृष्ट १३ जनालाई अवार्ड प्रदान गरिएको थियो ।