काठमाडौ । बालसाहित्यकार इन्द्र चौधरी ‘नेबासास बालपुस्तक लेखन पुरस्कार’ बाट पुरस्कृत हुनुभएको छ ।

कमलादीस्थित नेपाल प्रज्ञा प्रतिष्ठानमा दोस्रो बालपुस्तक प्रदर्शनी तथा उपत्यकाव्यापी बालकथा लेखन प्रतियोगिता कार्यक्रमको अवसरमा चौधरीलाई उक्त पुरस्कार प्रदान गरिएको हो । प्रतिष्ठानका कुलपति भूपाल राई, सदस्य सचिव धनप्रसाद सुवेदी र नेपाल बालसाहित्य समाजका अध्यक्ष प्रमोद प्रधानले संयुक्त रुपमा पुरस्कार प्रदान गर्नुभएको थियो ।

चौधरीलाई २०७९ सालमा रुम टु रिडद्वारा प्रकाशित ‘नयाँ वनपाले’ (प्रकाशित पहिलो र कथा दोस्रो) बालचित्र पुस्तकका लागि २०७९ को ८ वर्षभन्दा कम उमेर समूहको बालपुस्तक लेखनका लागि सर्वोत्कृष्टताका लागि उक्त पुरस्कार प्रदान गरिएको थियो ।
विगत ५ वर्षदेखि बालसाहित्य अनुवाद तथा लेखन गर्दै आउनुभएको चौधरीका हालसम्म ४ वटा बालचित्र कथाका पुस्तक प्रकाशित भएका छन् भने उहाँले अंग्रेजीबाट नेपाली र अंग्रेजी र नेपालीबाट थारु तथा रानाथारु भाषामा दर्जनौं बालकथा अनुवाद गर्नुभएको छ।

”छोटो समयमा नै सवोत्कृष्ट लेखनका लागि पुरस्कार पाउँदा निकै खुसी लागेको छ । यो मैले नसोचेको उपलब्धी हो,’ उहाँले भन्नुभयो, ‘यसले मलाई बालसाहित्यको क्षेत्रमा थप केही गर्ने ऊर्जा थपेको छ ।”
आधा दशक सञ्चारकर्मीका रुपमा काम गरेका चौधरी रङ्गमञ्च हुँदै हाल शिक्षकका रुपमा कार्यरत हुनुहुन्छ । पुरस्कार ग्रहणपछि चौधरीले कथालाई उत्कृष्ट बनाउनका लागि सम्पादकका रुपमा महत्वपूर्ण भूमिका निभाउनुभएका बालसाहित्यकार तथा आख्यानकार अनन्त वाग्ले र आकर्षक चित्र बनाउने अनुश्री लामालाई धन्यवाद व्यक्त गर्नुभयो । साथै उहाँले आफ्नो लेखनलाई मूल्यांकन गरी पुरस्कारका लागि योग्य ठानेकोमा मूल्यांकन समितिलाईसमेत धन्यवाद दिनुभयो ।

चौधरीसँगै लेखनतर्फ सिर्जना राईले २०७९ सालको ८ वर्षभन्दा माथिका उमेर समूहका लागि, कवि मित्रलाल पंगेनी २०७८ सालको ८ वर्षभन्दा मुनिका उमेर समूहका लागि र हरि खनाल २०७८ सालकै ८ वर्षभन्दा माथिका उमेर समूहका लागि पुरस्कार प्राप्त गर्नुभएको छ । त्यस्तै, चित्रांकनतर्फ २०७८ का लागि कलाग्रज बि र २०७९ का लागि कृषा ताम्राकार पुरस्कृत हुनुभएको छ ।