नेपाली शिक्षा परिषद्ले यस वर्षको “आदिकवि भानुभक्त पुरस्कार” गुरुकुलीय शिक्षाका माध्यमबाट नेपालमा शिक्षा विस्तारका लागि विशिष्ट योगदान पुर्याउनुहुने हरिहर सन्यास आश्रम देवघाटका पीठाधीश स्वामी श्री ज्ञानानन्द सरस्वतीज्यूलाई प्रदान गरिने भएको छ ।

सो पुरस्कार यही असार २९ गते १११ औँ भानु जयन्ती समारोहमा समर्पण गरिनेछ । पुरस्कारको राशि रु.१ लाख २५ हजार रहेको छ ।

त्यस्तै बैठकले यस वर्षको “गोपाल पाँडे असीम पुरस्कार” लेखन तथा अन्य विभिन्न रचनात्मक क्रियाकलापद्वारा नेपाली भाषाको श्रीवृद्धिमा उल्लेखनीय योगदान पुर्याउनुहुने श्री प्रद्युम्न जोशी, काठमाडौँलाई प्रदान गरिने भएको छ ।

पुरस्कार साउन ३२ गते परिषद्को ७४ औँ वार्षिकोत्सव समारोहमा समर्पण गरिनेछ । पुरस्कारको राशि रु.५० हजार रहेको छ ।

अध्यक्ष श्री रमा शर्माको सभापतित्वमा बसेको नेपाली शिक्षा परिषद्को प्रबन्ध समितिको बैठकले सो निर्णय गरेको हो ।

परिषद्बाट ‘आदिकवि भानुभक्त पुरस्कार’ २०५२ सालदेखि र ‘गोपाल पाँडे असीम पुरस्कार’ २०५० सालदेखि प्रत्येक वर्ष प्रदान गरिँदै आएको छ ।

साथै, राष्ट्रिय विभूति आदिकवि भानुभक्तको २११ औँ जयन्तीका अवसरमा असार २९ गते बिहान भानु मा.वि.रानीपोखरी अगाडि स्थापित भानुभक्तको प्रतिमामा माल्यार्पण तथा अपरान्ह लेखनाथ साहित्य सदन, सोह्रखुट्टे, काठमाडौँमा आदिकवि भानुभक्त पुरस्कार समर्पण कार्यक्रम रहेको छ ।