जीवन लामा, दोलखा  । कवि सुशिला खड्का हसिनाको कवितासङ्ग्रह “पहिरोभित्रको घाम”को चर्चा गरिएको छ । दोलखाको पर्यटकीय नगरी जिरीमा पुस्तकको चर्चा गरिएको हो ।

गृह जिल्ला दोलखामा कवि सुशिला खड्का हसिनाको पहिरोभित्रको घाम नामक कवितासंग्रहको चर्चाले जिरीमा निकै चर्चा लिएको थियो ।

जिरीमा अहिले दोस्रो जिरी महोत्सव चलिरहेको छ । महोत्सवले जिरीको आर्थिक, सामाजिक र पर्यटकीय क्षेत्रको चर्चा परिचर्चा चलिरहँदा जिरीको साहित्य उत्थानका लागि यस खालको कार्यक्रमले टेवा पुग्ने उद्देश्यले पुस्तक चर्चा गरिएको आयोजकले जानकारी दिएका छन् ।

महोत्सवमा दैनिकजसो विभिन्न विषयमा बहस, छलफल गर्ने कार्यक्रम तालिका अनुसार साहित्यको माध्यमबाट जिरीको विकास गर्नका लागि कार्यक्रम आयोजना गरिएको जिरी उद्योग वाणिज्य संघका अध्यक्ष बाबुराजा श्रेष्ठले जानकारी दिनुभयो ।

जिरी उद्योग वाणिज्य संघको आयोजनामा पुस्तक चर्चा समाजसेवी इन्द्रबहादुर खड्काको अध्यक्षता र जिरी उद्योग वाणिज्य संघका अध्यक्ष बाबुराजा श्रेष्ठको प्रमुख आतिथ्यतामा भएको थियो । पुस्तकमाथि साहित्यपोस्ट प्रधानसम्पादक अश्विनी कोइराला र प्रा.डा. ज्ञानु पाण्डेले चर्चा गर्नुभएको थियो ।

त्यस्तै, कार्यक्रम मधुपर्कका प्रधानसम्पादक त्रिभुवनचन्द्र वाग्लेले सहजीकरण र कवि गीता कार्कीले पहिरोभित्रको घामबाट कविता वाचन गर्नुभएको थियो ।