पोखरा । गायिका सुनिता थापाको नयाँ गीत तथा म्युजिक भिडियो ‘जुनी जुनीलाई’ सार्वजनिक भएको छ । गीतमा सुनिता तथा राजेन्द्र बाराजुलीको स्वरमा उक्त गीत म्युजिक भिडियोसहित सार्वजनिक भएकाे हाे ।

यो सुनिता थापाको पहिलो गीत हो । यसअघि उनले केही ट्र्याकहरूमा गीत रेकर्ड गर्दै सामाजिक सन्जालमा पोस्ट गर्दै आइरहेकी थिइन् ।

अष्ट्रेलियामा बसोबास गर्ने सुनिता गीत संगीतमा निकै समय बिताउने गर्छिन । पहिलो प्रयासबाट आफूलाई थुप्रै हौसला मिलेको आफ्नो अनुभव सुनाउँदै हरेकपटक नेपाल आउँदा एउटा गीत रेकर्ड गर्ने मनसाय रहेको कुरा गीत सार्वजनिक कार्यक्रमको अवसरमा बताइन् ।

म्युजिक भिडियोमा गायिका सुनिता र खिम लामिछाने काजीको अभिनय छ । काजी पोखरामा रहेर सामाजिक कार्य गर्नुका साथै फोटोग्राफी र साहित्यमा रुची राख्छन् ।

गीतको लेखन र सङ्गीत टेकनारायण चापागाईले गरेका छन् भने एरेञ्ज राजेन्द्र बाराजुलीको छ ।

युवाहरुमा हुने प्रेम तथा रोमान्सलाई गीतमा उनेर सङ्गीतबद्ध गरिएको छ भने सोहीअनुसारको कथामा आधारित रहेर निर्देशक तारानाथ आचार्यले भिडियो निर्देशन गरेका छन् । गीतको छायङ्कन अनिस खड्काले गरेका छन ।

गीतमा मोडल रहेका खिम काजीले पोखरा फेवातालको सौन्दर्यलाई उजागार गर्ने उदेश्यले लेकसाइड गौरीघाट परिसरमा रहेको शिवजीको मन्दिर तथा अन्य लेकसाइड वरपरका दृश्यहरुलाई भिडियो समावेश गरेको बताए ।

स्थायी घर पोखरा भएका महेन्द्र थापाले म्युजिक भिडियोको निर्माणदेखि सार्वजनिक गर्ने काम गरेका हुन् ।