साताकाे पुस्तककाे रूपमा साहित्यपोस्टलाई  ४० वर्ष शिक्षा सेवामा रहनुभएको कथाकार तथा कवि मोहनप्रसाद काफ्लेकृत आख्यानात्मक कृति “फिराद पत्र” प्राप्त भएको छ

१ सय ४ पृष्ठमा बुनिएको यस पुस्तकमा ‘अधुरो भाषण’, ‘बालोदरी’, ‘विश्वशान्ति’, ‘चिन्तामणि’, दुखमाथि दुःख’, ‘गौरीप्रसाद र कुर्सी’, ‘ज्येष्ठ नागरिक’, ‘के हालत होला’, ‘खुद्र छैन’, ‘मित्रता’, ‘रहर’, ‘सदाकम्पन’, ‘फिराद पत्र’, ‘सानेकी आमा’, ‘सन्नाटा’, ‘शिक्षाको अवसर’, ‘त्यो २० रुपियाँ’ आदि १७ थान कथा समावेश छन् । यस संग्रहमा लेखकले आफ्ना मीठा र आकर्षित भाषाशैलीबाट समाजमा, देशमा भइरहेका विकृति–विसङ्गतिप्रति सूूक्ष्म व्यङ्ग्य गर्न गर्न सफल भएका छन् । कथाअनुसारको पात्र जन्माउन सक्नु लेखकको विशेषता हो ।

फिराद पत्र

फिराद पत्र

“घरमै थन्किएर अनि पत्रपत्रिकामा छरिएर रहेकामध्ये उपलब्ध १६ थान कथा र लघुकथा फिराद पत्रमा समेटिएका छन् । सामान्य परिमार्जनसहितका केही कथा निकै पुराना भए पनि सान्दर्भिक नै होलान् । नयाँ–पुराना सबै कथा हाम्रो सामाजिक धरातलमा आधारित होलान् भन्ने मेरो अपेक्षा छ । केलाउने जिम्मा प्रबुद्ध पाठकगणमा सुम्पिएको छु ।” लेखक व्यक्त गर्छन्, “कथाभित्रका कतिपय संवाद र मनोवादमा पात्रानुकूल भाषिक प्रयोग हुनु अन्यथा नहोला भन्ठान्छु । त्यसबाहेक यथासम्भव मानक भाषाको वर्णविन्याससँग नजिकिने प्रयत्न गर्दागर्दै पनि कतैकतै चिप्लिएको हुन सक्छु, त्यसलाई अन्यथा नठानिदिनुहुन अनुरोध गर्दछु ।”

‘शिक्षाको अवसर’कथांश यस प्रकारको छ, “‘दोष यिनको होइन, यिनका बाबाको हो । उनले मृत्युवरण गरिसके । दोष अन्जानमै मेरो पनि हुन सक्छ । म पनि चाँडै मृत्युवरण गर्न सक्छु । तर यी निर्दोष टुहुरा बालकलाई समाजले किन शिक्षाबाट वञ्चित गर्छ ? समाजले त यिनको संरक्षण पो गर्नुपर्छ, होइन र ? मेरा निर्दोष छोराहरूले पढ्ने अवसर पाउनुपर्छ । राज्यले यो कुरा सुनोस्…। सरकारले यस कुरालाई गम्भीरताका साथ सोचोस्… । बोल मानवअधिकारकर्मीहरू ! बोल बालअधिकारका हिमायतीहरू ! यिनले शिक्षाको अवसर पाउनुपर्छ ! खबरदार…!’

एउटा एउटा हात दुवै छोराका टाउकामा राखेकी लक्ष्मी आँखाबाट बरर आँसु बर्साउँदै प्रिन्सिपलका अगाडि चिच्याइरहेकी थिइन् । दुवै छोराले आँसु बर्साउन आमालाई सघाइरहेका थिए । प्रिन्सिपल अवाक् थिए । सबै शिक्षकशिक्षिका मौनता छर्दै प्रिन्सिपलका पछाडि खडा थिए । प्रे–लाइनमा उभिएका सबै छात्रछात्रा मूर्तिवत् देखिन्थे ।”

पुस्तकलाई फिनिक्स बुक्सले बजारमा ल्याएको हो ।