साताकाे पुस्तककाे रूपमा साहित्यपोस्टलाई  पत्रकार तथा कवि नहकुल जोशीकृत नवीनतम उपन्यास “नाजवाफ” प्राप्त भएको छ ।

नाजवाफ

“प्रस्तुत उपन्यास आञ्चलिक हो । कुनै खास क्षेत्रमा रहेर वा रोजेर त्यहाँको सामाजिक सांस्कृतिक मौलिकता एवं विशेषता प्रस्तुत सिद्धान्त एवम् मान्यतालाई आञ्चलिकता भनिने हुन्छ । लेखकले बाजुरा तथा आसपासको क्षेत्रलाई केन्द्रमा राखेर आफ्ना कथाहरूको माला उ अवस्था छ । कुनै पनि व्यक्ति आफू जन्मे हुर्केको ठाउँ र समाजलाई बिर्सन सक्दैन ।” भूमिकामा डा. राजेन्द्रकुमार आचार्य लेख्छन्, “जन्मिनेबित्तिकै देखेको धर्तीमा आकर्षित हुनै पर्दछ । त्यसो भएन भने उसले धर्तीप्रति नै अन्याय गरेको हुन्छ । आफू रहेको हुर्केको ठाउँ, जाति, संस्कृति आदिबाट प्रभावित भएर सो स्थानलाई केन्द्रमा राखेर वरपरको पर्यावरण, कुनै जाति, क्षेत्र र संस्कृति विशेषलाई साहित्यमा उतार्न खोज्दा आञ्चलिक साहित्यको जन्म हुन्छ । लेखकले पनि एक आञ्चलिक शिशुको जन्म दिएका छन् । शिशु जन्माउँदा हुने पीडाका बारेमा जन्माउनेलाई मात्र थाहा हुन्छ । अरूले आहा कति राम्रो भन्ने मात्र हुन् । राम्रोभन्दा पनि राम्रो त हो नाक लामो, आँखा चिम्रा, कपाल कैलाजस्ता टिप्पणी त हामी जोकोहीले गर्दछौँ । यस्तै टिप्पणी प्रस्तुत नाजवाफ शिशुमा पनि छ । त्यो हेर्ने, अवलोकन गर्नेले कसरी बुझ्छ त्यसमा भर पर्दछ । ‘नाजवाफ’ पढ्दा यसले गम्भीर भएर सोच्न बाध्य बनाउँछ । उपन्यास पढेर नेतृत्व तहमा बसेकाको चेत खुलोस् र पटकपटक प्रश्न तेर्साउन नपरोस् ।”

पछिल्लो पृष्ठमा डा. नवराज लम्साल लेख्छन्, “ नेपाली सन्दर्भमा युद्धसाहित्य लेखिन बाँकी छ र साहित्यिक बहसको झन् बढी आवश्यकता छ । यसै त कम लेखिएको भनिएको कर्णाली र सुदूरपश्चिम र लेखिएका मध्ये पनि कतिपय लेखकलाई त्यता टेक्दै नटेकी सुनेको भरमा लेखेको आरोप लागेको बेला बाजुराबाट यो पुस्तक आउनु नै एउटा सुन्दर पक्ष हो । जात, सम्पत्ति, युद्ध, राजनीति, प्रेम, संस्कृति र स्थानीय आकांक्षा एउटै कथा भएर बग्दा किशोर चेतना कसरी खलबलिन्छ र मनमा कसरी कुत्ती खेल्छन् परिवर्तनका आँधीबेहरी ? सरल तर सम्प्रेष्य मनोद्वन्द्व छ यसमा । यो नहकुलको आफ्नै वा आफ्नै पुस्ताको द्वन्द्व हो । सत्ताको इतिहास त जित्नेकै लेखिएला, लेखिन्छ पनि तर यही इतिहास र संवेदना हो साहित्यले लेख्ने, जुन कुरा बाजुराका नहकुलले कोसिस गरेका छन् । ती सीमान्तकृतलाई नछोए त साहित्य कसरी साहित्य बन्ला र ?”

भुँडीपुराणबाट प्रकाशित, १ सय ९५ पृष्ठमा आधारित यस पुस्तकको मूल्य ४ सय ३० रुपियाँ रहेको छ ।