साताकाे पुस्तककाे रूपमा साहित्यपोस्टलाई  नेपाली साहित्यमा विगत साढे चार दशकदेखि निरन्तर बहुविधामा लेख्ने साहित्यकार गोविन्द गिरी प्रेरणाको पहिलो कथासङ्ग्रह जुन चालिस वर्षपछि पुनः प्रकाशनमा आएको ‘सुतेको समुद्र’  प्राप्त भएको छ ।

६६ पृष्ठमा बुनिएको यस पुस्तकमा ‘आफ्नो–आफ्नो दुनो’, ‘बैँसका उन्मादहरू’, ‘नयाँ बाटो’, ‘बेग्लाबेग्लै संसार ः बेग्लाबेग्लै आकाश’, ‘सहरभित्रको जीवन’ लगायत २० थान कथा सङ्ग्रहित छन् । प्रायः यसभित्रका कथाहरू यथार्थवादी शैली र शिल्पमा रचिएका छन् भने कतिपय कथाहरू सहरी निम्नवर्गीय समाजको गरिबी, अभाव आदिलाई विषय बनाएर लेखिएको पाइन्छ । त्यस्तै प्रेम वा प्रणयपरक कथाहरू पनि समावेश छन् ।

सुतेकाे समुद्र

“कथाका चरित्र यथार्थपरक, जीवनअनुरूप र विश्वसनीय छन् । कुण्ठा, मनोद्वन्द्व र पारस्परिक द्वन्द्वले गर्दा चरित्र सजीव भएका छन् ।” भूमिकामा प्रा. डा. कुमारप्रसाद कोइराला लेख्छन्, “कथाका शीर्षक फुटकर कविताका जस्ता लाग्दछन् । कतिपय शीर्षक लयात्मक पनि छन्, जस्तै – ‘बेग्लाबेग्लै संसार बेग्लाबेग्लै आकाश, ‘रात गहिरिँदै जान्छ’ । तिनले कथाको मूल कथ्यलाई लाक्षणिक, व्यङ्ग्यात्मक, बिम्बात्मक र आलङ्कारिक पारेर प्रस्तुत गरेका छन् । भाषाशैलीका दृष्टिले हेर्दा गिरीमा आख्यानात्मक शैली निर्माण गर्ने सहज प्रतिभा देखिन्छ, तर भावुकता भरिएको बीसबर्से कथाकारको गहिरो प्रभाव पनि त्यसमा मिसिएको छ । त्यसैले यथार्थवादी शैली पनि कतिपय ठाउँमा संवेगप्रधान, भावनात्मक, लयात्मक र कवितात्मक लाग्दछ । अन्यत्र शैली सामान्य बोलीचालीको, परिवेशसापेक्ष र चरित्रअनुरूप छ । छोटा वाक्य प्रयोग गरिएको, सूत्रात्मक, वर्णनात्मक, तार्किक शैलीले कथा पठनीय भएका छन् ।”

कथाकार गोविन्द गिरी प्रेरणा उल्लेख गर्छन्, “कथा लेख्नु जीवन लेख्नु हो भन्छु । चरित्र, स्थिति, परिवेश वा घटनाको माध्यमबाट लेख्ने त मान्छेकै कथा हो । जीवनकै कथाव्यथा हो । मैले यी सबै कथाहरू हालै फेरि पढिरहँदा भावुक हुन पुगेँ, तत्कालीन लेखनको परिवेश सम्झना गरेर अथवा यसका पात्रहरूको मनोदशा अनुभूत गरेर, तत्कालीन समयको सम्झना गरेर । लेखनमा, शैलीमा, प्रस्तुतिमा सिकारुपन भए पनि यिनमा जीवनको झल्को देखें । मानिसका सुखदुःख देखें र आफूले देखेको जीवन र पात्रहरूलाई त्यतिखेरको आफ्नो क्षमताअनुसार प्रस्तुत गरेछु । त्यसो त, आज पनि म मान्छेकै जीवन त लेखिरहेको छु नि । सुख दुःख त लेखिरहेको छु नि । शैली माझिँदै गयो होला । परिष्कृत हुँदै गयो होला । फरक ढङ्गले अभिव्यक्त गर्न सक्षम भएँ होला । तर लेख्न त मान्छेकै कथा लेख्ने हो । मान्छेको जीवन लेख्ने हो ।”

साझा प्रकाशनबाट बजारमा ल्याइएको यस पुस्तकको मूल्य १ सय ९० रुपियाँ रहेको छ ।