दाङ / राप्ती साहित्य परिषद दाङको आयोजनामा साहित्यकार नारायण नेपालद्वारा रचित तथा लोकप्रिय सङ्गीतकार सन्तोष श्रेष्ठद्वारा सङ्गीतबद्ध गीत तथा गजल सङ्ग्रह ‘माया’ शनिबार एक कार्यक्रमका बीच होटल माला इन दाङमा लोकार्पण गरिएको छ ।

राप्ती साहित्य परिषद् दाङ शाखाका अध्यक्ष दीपक शर्मा “समीर”को अध्यक्षता तथा प्रथम नेपाली नारी महाकाव्यकार बुनु लामिछानेको प्रमुख आथित्यतामा विमोचन कार्यक्रम सम्पन्न भएको थियो ।

सो गजलसङ्ग्रहको समीक्षा राप्ती साहित्य परिषद् केन्द्रीय अध्यक्ष डा. टीकाराम उदासी र अर्का समीक्षक सुबोध रेग्मीले गर्नुभएको थियो।

राप्ती साहित्य परिषद् दाङ शाखा सदस्य हरिप्रसाद पौडेल “स्वर्णशिखा”को स्वागत मन्तव्यबाट शुभारम्भ भएको कार्यक्रममा गजलसङ्ग्रहका लेखक साहित्यकार नारायण नेपाल तथा वरिष्ठ सङ्गीतकार सन्तोष श्रेष्ठ उपस्थित सम्पूर्णमा हार्दिक धन्यवाद तथा आभार प्रकट गर्नुभएको थियो भने कार्यक्रमको सञ्चालक सचिव प्रकाश के.सी.ले गर्नुभएको थियो ।