दधिराज सुवेदी प्रतिष्ठान विराटगरले साहित्यकार भागीरथी श्रेष्ठ र पत्रकार धर्मेन्द्र झालाई पुरस्कृत गरेको छ । प्रतिष्ठानले विराटनगरमा आयोजित कार्यक्रममा श्रेष्ठ र झालाई पुरस्कृत गरेको हो ।

साहित्यकार श्रेष्ठलाई ५१ हजार र झालाई २५ हजार रूपैयाँ राशिको पुरस्कार नेपाली कांग्रेसका नेता डा. शेखर कोइराला, विराटनगर महानगरपालिकाका मेयर नागेश कोइरालालगायतले हस्तान्तरण गरेका हुन् ।

कार्यक्रममा साहित्यकार दधिराज सुवेदीको उपचारमा संलग्न भक्तपुर क्यान्सर अस्पतालका डा. उज्ज्वल चालिसेलाई समेत सम्मान गरिएको थियो ।

छोराहरू शरदराज सुवेदी र रूपक सुवेदीले पिता दधिराज सुवेदीको नाममा प्रतिष्ठान स्थापना गरेका हुन् । १५ लाख रूपैयाँको अक्षयकोष राखेर स्थापित प्रतिष्ठानबाट यसअघि ७ जना साहित्यकार र ७ जना पत्रकार पुरस्कृत भइसकेका छन् ।