साहित्यकार कुमार नगरकोटीले लेखेको एक कथामा कलाकार, निर्माता तथा निर्देशक नीर शाहले फिल्म निर्माण गर्ने भएका छन् ।

यसअघि शाह उपन्यासकार विजय मल्लको नाट्य कृति ‘कोही किन बर्बाद होस्’मा आधारित कथानक फिल्म बनाउने तयारीमा थिए । तर तत्काललाई यो फिल्मको निर्माण स्थगन भएको छ । यसको स्तगनसँगै शाहले नगरकोटीकाे कथामाथि फिल्म बनाउने तयारी थालेका हुन् ।

केही समयअघि एक औपचारिक कार्यक्रममा शाहले कुमार नगरकोटीको कथामा फिल्म बनाउने आफ्नो ठूलो इच्छा रहेको बताएका थिए । फेन्टासी र स्वरैकाल्पनिक कथावस्तुमा बन्न यो फिल्मको निर्देशन नयाँपुस्ताको कुनै एक निर्देशकले गर्ने जनाइएकाे छ ।

नीर शाह फिल्म्सको ब्यानरमा बन्ने यो फिल्मको छायाङ्कन चैत वा वैशाखदेखि सुरु गर्ने तयारी छ ।

नगरकोटी अतिथि लेखक रहेको फिल्म ‘लालपुर्जा’ यसअघि प्रदर्शन भइसकेको छ । शाहले भने पछिल्लोपटक ‘परदेशी २’ मा अभिनय गरेका थिए ।