षडानन्द अधिकारी आध्यात्मिक पत्रकारिता सम्मानबाट धादिङका कमल रिजाल सम्मानित भएका छन् । शब्दयात्रा प्रकाशनले आयोजित एक समारोहका बिच आध्यात्मिक लेखक, आध्यात्मिक स्तम्भकार तथा सञ्चारकर्मी रिजाललाई उक्त सम्मान प्रदान गरिएको हो ।

सोही कार्यक्रममा शब्दयात्रा कालु वैद्य आयुर्वेद सम्मान भोजपुरका डा. ठाकुरराज अधिकारी र शब्दयात्रा मेलवादेवी गुरुङ महिला प्रतिभा सम्मान पाल्पाकी बेटी बज्राचार्यलाई प्रदान गरिएको छ । त्यस्तै, शब्दयात्रा कृष्णलाल अधिकारी साहित्यिक पत्रिका सम्मान काठमाडौँको ‘शिवपुरी सन्देश’ र शब्दयात्रा गोपाल प्रधान स्तम्भकार सम्मान सोलुखुम्बूका अनारसिंह कार्कीलाई समर्पण गरिएको छ ।

त्यसैगरी  शब्दयात्रा रत्नदेवी प्रधान फोटो पत्रकारिता सम्मान तनहूँका जगदीश तिवारी र शब्दयात्रा नीलकण्ठेश्वर कृष्णमणि आध्यात्मिक संस्था सम्मान सिन्धुपाल्चोकको कफेश्वर महादेवस्थान व्यवस्थापन समितिलाई समर्पण गरिएको छ ।

शैक्षिक शिरोभूषण डा सुरेशराज शर्माको प्रमुख आतिथ्य, भ्रष्टविरोधी शास्त्रका प्रणेता भरत जङ्गमको आतिथ्य र संस्थाका आजीवन सदस्य प्रा. केदारनाथ श्रेष्ठको सभापतित्वमा सम्पन्न समारोहको सञ्चालन संस्थापक अध्यक्ष हरि मञ्जुश्रीले गरेका थिए ।

आजीवन सदस्य पदम दाहालले समुद्घाटन गरेको कार्यक्रममा  सकुल थापा, कृष्णमणि कुइकेल,  हरिगोपाल प्रधान, शारदाप्रसाद शर्मा,  अमृत अधिकारी,  सङ्गीता केसील गोविन्दबहादुर खड्का, जयराम श्रेष्ठ, लालबहादुर भुजेल, केशव रूपाखेती, उद्धवप्रसाद नेपाललगायतको सहभागिता रहेको थियो ।

कार्यक्रममा आबाल ब्रह्मचारी षडानन्द अधिकारी र मनका श्रेष्ठको तस्बिरमा माल्यार्पण गरिएको थियो ।