समर्पण लामाले भारतको डान्स रियालिटी शो ‘इन्डियाज् बेस्ट डान्सर सिजन ३’को उपाधि जितेका छन् । शनिबार भएको फाइनलमा उनले ट्रफीसहित १५ लाख भारू जितेका हुन् ।

लामासँगै उनका कोरियोग्राफर भावना खन्डुजाले ५ लाख भारू पुरस्कार हात पारेका छन् ।

समर्पणले फानालिस्ट सिवांशु सोनी, विपुल काँडपाल, अंकित चौहान, अञ्जली मामगाईलाई पछि पार्दै उपाधि जितेका हुन् ।

उपाधि जितेपछि समर्पण भने, ‘मेरो लागि सपना जस्तै हो यो जित्नु । सधैं रियालिटी शो हेर्थे र कुनै दिन म पनि शोमा सहभागी हुन्छु भनेर सोच्थेँ । डान्स रियालिटी शो जित्छु भन्ने चाहिँ कहिल्यै सोचेको थिइनँ ।’

समर्पण चितवनका स्थायी बासिन्दा हुन् । उनका आमा र भाइ चितवनमै बस्छन् भने बुवा रोजगारको सिलसिलामा विदेशिएका छन् ।