साताका पुस्तकका रूपमा साहित्यपोस्टलाई  पत्रकार लक्ष्मी लम्साल ‘लक्ष्मीपूजा’को गैरआख्यान पुस्तक ‘नि हाउ ! नमस्ते !’  प्राप्त भएकाे छ ।

२ सय ६२ पृष्ठमा बुनिएको यस पुस्तकमा ‘भाषा संस्कृति’, ‘चिनियाँ वसन्त पर्व र नेपाली दशैँ’, ‘गरिबी निवारणका चिनियाँ सूत्रहरू’, ‘तितो चियाको मिठो कथा’लगायत १५ थान नियात्रा सङ्ग्रहित छन् ।

मेरो भनाइमा लेखक लेख्छन्, “चीन कसरी फेरिँदै गयो, के कसरी यहाँ समृद्धिको ढोका खुल्यो, कसरी मानिसहरू आधुनिक हुँदै गए इत्यादि कुराहरू पस्किएबाट हामीले एउटा छिमेकीसँगको केही जानकारी र अवधारणा बनाउन सकौँला कि भन्ने मनसाय राखिएको छ ।”

पुस्तकको पछिल्लो पृष्ठमा लेखिएको छ, “सी श् का ठुलठुला खुट्टा थिए, साहसी सुन्दरी वाङ्गका पाखुरा बराबर थिएनन्, एउटा अग्लो अर्को होचो, त्याओको आँसुमा समस्या थियो, एउटा ठुलो अर्को सानो र याङ्गलाई थाङ्ग राजवंश कालमा दरबारकी सबैभन्दा सुन्दरी मानिन्थ्यो तर उनको शरीरबाट दुर्गन्ध फैलिन्थ्यो । त्यसपछिको समाजले साना खुट्टा हुनु चिनियाँ महिलाको सुन्दरताको मानक मान्यो जसका लागि काठका जुत्ता बनाएर सानैदेखि जडान गरिदिने चलन थियो, खुट्टा बढ्न नपाएर सानै रहन्थे जसलाई सुन्दरताको रूपमा लिइन्थ्यो तर अहिले त प्लास्टिक सर्जरीको व्यवसाय फस्टाएको छ ।

अहिले मोडिएका परेला, बाक्लो नितम्ब, ठुला स्तन, ठुला आँखा, भँगेराको जस्तो आवाज, मिठो बोली, ज्ञानी, प्रवीण, चन्द्रमाजस्तो उज्ज्वलता, असल प्रवृत्ति भएकी युवतीलाई सुन्दरताको कसीमा राख्ने गरिन्छ । हिन्दु समाजमा बत्तीस गुणले युक्त युवतीलाई सुन्दरताकी प्रतीक मानिन्छ । यस विषयमा चाइना डेली ब्लगमा व्यापक टिप्पणी पनि चलेको थियो । तब हिन्दु युवतीका सुन्दरताका प्रतीक मानिने कुराहरूलाई धेरै महादेशबाट आएका प्रयोगकर्ताहरूले हावामा उडाइदिए ।”

पुस्तकलाई बुलबुल पब्लिकेसनले बजारमा ल्याएको र यसको मूल्य ३ सय रुपियाँ रहेको छ ।