संस्थागत विद्यालय संघ नेपाल (इसान) द्वारा कृष्टिना भण्डारीको स्मृतिमा मिति २०८० जेठ २ गते मङ्गलबार क्यान्सर रोगसँगसम्बन्धी परामर्श र निबन्ध लेखन प्रशिक्षण सहितको इसान कृष्टिना निबन्ध लेखन प्रतियोगिता २०८० सम्पन्न गरियो । प्रतियोगितामा विभिन्न ३२ विद्यालयका ३८ जना विद्यार्थीको सहभागिता रहेको थियो ।

साहित्यकार शान्ति शर्मा

प्रतियोगिताअघि प्रशिक्षण दिनुहुँदै दियालो साहित्य सरगमकी अध्यक्ष शान्ति शर्माले आधुनिक उपचार पद्धतिले चौथो स्टेजको आफ्नो क्यान्सर समेत निको भएका उदाहरण प्रस्तुत गर्नुहुँदै क्यान्सरलाई आत्माविश्वासले जितेर अवसरका रूपमा उपयोग गर्न सकिने र क्यान्सरपश्चात अझै सुन्दर ढङ्गले जीवन चलाउन सकिने बताउनुभयो ।

वाल्मीकि क्याम्पसका उप-प्राध्यापक डा. शेखर दाहालले निबन्ध लेखनका कुराहरूलाई मिहिन ढङ्गले केलाउँदै एउटा असल निबन्ध तयार पार्न ध्यान दिनुपर्ने सम्पूर्ण कुराहरू सिकाउनुभएको थियो ।

जोरपाटीस्थित याम्ब्यासडर एकेडेमीमा सञ्चालित कार्यक्रममा आयोजक विद्यालयका प्रिन्सिपल मोहन मल्लको सभापतित्वमा सञ्चालित कार्यक्रममा इसान पूर्व अध्यक्ष परिषदका अध्यक्ष राजकुमार श्रेष्ठले स्वागत मन्तव्य दिनुहुँदै कार्यक्रमले पुरस्कार दिने र निबन्ध लेखन सिकाउने मात्र नभएर क्यान्सर रोग विरुद्धको सचेतना फैलाउने प्रमुख उद्देश्य राखेको बताउनु भयो ।

कक्षा ४ मा अध्ययन गर्दागर्दै क्यान्सर रोगका कारण असामयिक निधन
भएकी कृष्टिना भण्डारीको सम्झनामा क्यान्सर रोगलाई नै विषय बनाएर संस्थापक विद्यालय संघ नेपाल (इसान) ले हरेक वर्ष निबन्ध प्रतियोगिता आयोजना गर्दै आएको छ ।

यस प्रतियोगिताको पुरस्कार वितरण अर्को कार्यक्रममा गरिने कुरा आयोजकले बताएको छ । कार्यक्रमलाई इसानका महा-सचिव, अलमाइटी स्कुलका प्रिन्सिपल तथा साहित्यकार गणेशप्रसाद खतिवडाले सञ्चालन गर्नुभएको थियो ।