अन्तर्राष्ट्रिय नेपाली साहित्य समाज बिओटीका अध्यक्ष एवं पदम विश्वकर्मा साहित्य प्रतिष्ठानका संस्थापक पदम विश्वकर्माको उपस्थितिमा उक्त समारोह भएको हो ।

नेपाल प्रज्ञा प्रतिष्ठानका कुलपति भूपाल राईको प्रमुख आतिथ्यमा भएको उक्त समारोहको सभापतित्व नेपाल दलित तथा संस्कृति प्रतिष्ठानका अध्यक्ष रणेन्द्र बराइलीले गर्नुभएको  थियो  ।

प्रतिष्ठानका अध्यक्ष डा. मानबहादुर विश्कर्माले स्वागत मन्तव्य तथा प्रतिष्ठानका विषयमा पदम विश्वकर्माको मन्तव्यपश्चात् प्रतिष्ठानबाट प्रकाशित कृति “प्रतिबन्ध” कथासङ्ग्रहको लोकार्पण प्रमुख अतिथि भूपाल राईलगायत मञ्चासीन सबैले गरेका थिए ।

साहित्यकार सम्पादक रमेश दाहालको सम्पादन रहेको उक्त कृतिभित्र भेदभावविरुद्धका २० ओटा कथाहरू रहेका छन् ।

प्रतिष्ठानले गरेको विद्यालयस्तरीय राष्ट्रव्यापी कविता प्रतियोगितामा प्रथम, द्वितीय र तृतीय भएका कविताका सर्जकलाई क्रमशः नगद पुरस्कारसहित प्रमाणपत्र प्रदान गरिएको थियो ।

पुरस्कृत कविताका स्रष्टाहरू तृतीय हुने रुपेश सदाय, द्वितीय हुने नविना लम्जेल र प्रथम हुने सलिना विकले पुरस्कृत कविता वाचन गर्नुभएको थियो ।

प्रतिष्ठानले जातीय भेदभावविरुद्ध सशक्त कलम चलाउने सामाजिक अभियन्ता एवं साहित्यकार डिकबहादुर विश्कर्मालाई नगद राशीसहित सम्मान पत्र अर्पण गरिएको थियो भने प्रतिष्ठानका अध्यक्ष एवं नेपाल सरकारका पूर्व सचिव डा. मानबहादुर विश्वकर्माद्वारा स्थापित भीम माया स्मृति प्रतिष्ठानले सञ्चारक्षेत्रबाट भेदभावविरुद्ध अभियान चलाएवापत चन्द्रमान विश्वकर्मालाई नगद राशिसहित सम्मानपत्र प्रदान गरिएको थियो ।

समारोहमा पूर्व राजदूत तथा छनोट समितिका संयोजक पद्म सुन्दास, नेपाल प्रज्ञा प्रतिष्ठानका प्राज्ञसभा सदस्य बाबा बस्नेत, पञ्चकुमारी दर्जी, ग्लोबल फोरम अगेन्स्ट कास्ट बेस्ड डिस्क्रिमिनेसनका वरिष्ठ उपाध्यक्ष मोती नेपाली, कविता प्रतियोगिता व्यवस्थापन समितिका संयोजक आर.बि. निश्चलले शुभकामना मन्तव्य दिनुभएको  थियो ।