प्रगतिशील लेखक संघ, सुनसरी शाखाले कला पुरस्कारसमेत दिने भएको छ । यसअघि प्रलेस सम्मान र प्रगतिशील युवा साहित्य पुरस्कार प्रदान गर्दै आएको यस संस्थाले नयाँ विधामा पुरस्कार दिने घोषणा गरेको प्रलेस सुनसरीका अध्यक्ष टीका मिलनद्वारा जारी विज्ञप्तिमा जनाइएको छ ।

२०७७ सालमा प्रलेस अक्षय कोष स्थापना गरी सोही कोषबाट हरेकवर्ष दुई जना स्रष्टालाई संघले सम्मान तथा पुरस्कार प्रदान गर्दै आइरहेको छ ।

गत फागुन १३ गते बसेको प्रलेस सुनसरीको बैठकले विभिन्न द प्रलेस सम्मान २०७९ साहित्यकार केशव कुमार सुनामलाई, त्यस्तै राजकुमार कार्की प्रगतिशील युवा साहित्य पुरस्कार कवि प्रकाश दिप्साली राईलाई प्रदान गर्ने निर्णय गरेको छ ।

यसैगरी सुनसरी जिल्लामा रहेर कलाकारिता (अभिनय, गायन तथा नृत्य) क्षेत्रमा योगदान दिइरहेकाहरू मध्येलाई प्रलेस कला पुरस्कार पनि प्रदान गर्ने भएको हो । यस वर्षको यो विधामा गायिका सुनिता कटुवाललाई प्रलेस कला पुरस्कार प्रदान गरिने भएको छ ।

पुरस्कार आउँदो चैत १६ गते इटहरीमा तीन विधाका यी पुरस्कार तथा सम्मान प्रदान गरिने जारी विज्ञप्तिमा जनाइएको छ।