साहित्यपोस्टको यो १४ सय ७६ औँ अङ्क हो । अबको २५ दिनपछि हामी १ हजार ५ सय अङ्क पार गर्ने पहिलो नेपाली साहित्यिक पत्रिका बन्दैछौँ । संयोगकै कुरा हो, साहित्यिक पत्रिकाको इतिहासमा यसले पहिलो दैनिक पत्रिका र धेरै पाठक भएको पत्रिकाको पगरी पनि गुथ्न पाएको छ । सबैभन्दा पहिला यी संयोगहरू जुराइदिने पाठक, समीक्षक, लेखक, कवि, शुभेच्छुक, विज्ञापनदाता एवं यो क्षेत्रको खबरदारी गर्ने भाषा-साहित्य समालोचकहरूलाई धन्यवाद ज्ञापन गर्दछौँ ।

साहित्यको धार र पठनको शैली दुवै परिवर्तन भएको सङ्केतका रुपमा साहित्यपोस्टलाई बुझ्न सकिन्छ । छापा साहित्यमा पाठकको पहुँच कम हुँदै जानु र यही बेला हाम्रो समाज पनि प्रविधिमैत्री हुँदै जानुको अवसरलाई साहित्यपोस्टले छोप्ने प्रयास गरेको थियो । यो प्रयास सफल भएको छ । यद्यपि साहित्यपोस्ट र अनेक विषयका हजारौँ पत्रिकाहरूलाई सर्व पहुँचमा पुग्न सहज बनाइदिने ज्याक डर्सी, पाल एलन, मैट मुलनबेग, काइक लिटिल, ल्यारी पेज, सर्जरी बेन, स्टिभ जब्स, मार्क जुकरबर्ग, आइबिएम साइमन जस्ता दिग्गज प्रविधिप्रेमी उद्यमीहरूको कल्पनाले पनि हामी ठूलो पाठक-समूहसम्म पुग्न सकेका हौँ । साहित्यपोस्टको पाँचौँ स्थापना दिवस तथा चौथो वार्षिक उत्सवका अवसरमा हामी ती प्रविधि उद्यमीहरूका नवीनतम सोचहरूलाई नमन गर्न चाहन्छौँ ।

आधुनिक संसारमा प्रविधिले ल्याएको उथलपुथल र व्यवसायीकरणको फाइदा साहित्य-कला जस्तो साधनाको संसारमा रमाउनेहरूले पनि उठाउन पायौँ । यही कारण नेपालभित्र मात्र होइन, भारतका नेपालीभाषी राज्यहरू अनि सयौँ वर्षदेखि बर्मा, भुटान र थाइल्यान्डमा रहेका नेपालीभाषीहर पनि साहित्यपोस्टसँग जोडिनु भएको छ । नेपालबाट रोजगारीका लागि खाडी मुलुकमा पुग्नुहुने हजारौँ नेपाली, शिक्षा र अवसरको खोजी गर्दै युरोप, अमेरिका, अस्ट्रेलिया पुग्ने हजारौँ भाषा र साहित्य-प्रेमीहरू पनि साहित्यपोस्टसँग जोडिनु भएको छ । त्यसै गरी जापान, कोरिया जस्ता विकसित देश मात्र होइन, अनकन्टार अफ्रिकी मुलुकमा रहने नेपालीहरू पनि साहित्यपोस्टका पाठक हुनुहुन्छ । भाषा र साहित्यको यति ठूलो जागरण, आफ्नो जन्मभूमि र आफ्नो भाषाप्रतिको यति ठुलो लगाव देखेर हामी अह्लादित भएका छौँ ।

यही विश्वास र भरोसाकै कारण साहित्यपोस्टले हरेक दिन नयाँ स्वादको साहित्य नवीनतम प्रविधिमा पस्कने प्रयास गरिरहेको छ । अब हामी नवीनतम प्रविधिको प्रयोग गरेर पुरानाभन्दा पुराना र बहुचर्चित पुस्तकहरू (त्यो २ प्रति नै किन नहोस्) ग्राहकले माग गरेको ४८ घण्टाभित्र छपाइ गरेर दिन सक्ने भएका छौँ ।  हाम्रा पाठकहरूले दैनिक एक रुपियाँसम्ममा साहित्यपोस्टका सामग्री तथा सयाैँ पुस्तक एउटै भाँडोमा पढ्न सक्ने एपको सुविधा प्राप्त गर्दै हुनुहुन्छ । पुस्तक प्रकाशन गर्न उचित प्रकाशक र सम्पादक नपाइरहनु भएका लेखकहरूले एउटै थलोमा प्रकाशक र सम्पादक प्राप्त गर्ने अवसर जुरेको छ । आफ्ना रचनाको स्तर थाहा नपाउँदा नयाँ लेखकहरूमा हुने औडाहा साहित्यपोस्टको कार्यालयले उचित सुझावका साथ एक घण्टाभित्र समाधान गर्ने व्यवस्था मिलाएको छ । पुराना र स्थापित लेखकहरूले साहित्यपाेस्टसँगकाे सहकार्यमा धेरथोर आम्दानी गर्ने वातावरण बन्दै गएको छ । साहित्यपोस्टको युट्युब च्यानलमार्फत लुकेका प्रतिभाहरूको अन्तर्वार्ता पनि गरिरहेका छौँ । देश र विदेशमा हुने सम्पूर्ण साहित्यिक गतिविधिका समाचारहरू दैनिक प्रकाशन भइरहेको छ ।

नेपाली संस्करण बाहेक हामी दैनिक अंग्रेजी भाषामा पनि साहित्य सामग्री पस्किरहेका छौं । नेपाली साहित्यलाई अन्तर्राष्ट्रियकरण  गर्ने र अंग्रेजीमा सहज महसुस गर्ने शहरी युवापुस्तालाई यो क्षेत्रमा आकर्षित गराउने प्रयास हो । अंग्रेजी भाषामा पनि उत्तिकै सहयोग गर्ने सम्पूर्ण लेखक, कविमा पनि धन्यवाद टक्राउँदछौं ।

पाठकहरूकै भरोसाका कारण हामीले यसरी पखेटा फिँजाउन पाएका हौँ । साहित्य पनि व्यावसायिक संस्था बन्न सक्छ भन्ने सोचलाई यहाँहरूको साथ, सहयोग र सुझावले पक्कै पनि पूरा गर्नेछ भन्ने हाम्रो विश्वास छ । नेपाली भाषा  साहित्य, स‌ंस्कृति र कलालाई मर्न दिनु हुँदैन भन्ने सोच राख्ने स‌ंसारभरि छरिएर रहनु भएका नेपाली र नेपालीभाषीहरूकाे आर्थिक, बौद्धिक, नैतिक र भावनात्मक सहयोग नै हाम्रो प्राण हो ।

साहित्यपोस्टको चौथो वार्षिक उत्सवका अवसरमा यो क्षेत्रसँग सम्बन्धित सबैमा हार्दिक कृतज्ञता व्यक्त गर्दछौँ ।

अश्विनी कोइराला

प्रधानसम्पादक