युवराज भण्डारी (क्यानडा)

१

करोडौँमा चुनेर मन पराउने पनि माया
कैले देखूँ कैले भेटूँ गराउने पनि माया
प्रेमको जादुमा जोकर बन्छ कोही यहाँ
मुटुमा राख्दा राख्दै हराउने पनि माया

२

उकाली चढ्नु अनि ओराली झर्नु जीवन
कहिले खहरे कहिले सागर तर्नु जीवन
विफलताको डरले काँपेर पुगिँदैन कहीँ
भगाएर मनको डर अगाडि सर्नु जीवन

३ 

प्रगतिमा लम्सिएकाहरूलाई घचेट्ने संस्कार हावी भयो
स्वार्थका निम्ति आफ्नै धरातल मेट्ने संस्कार हावी भयो
सिद्धान्त भन्दा ठीक विपरीत काम गर्छन् यिनीहरु
टुप्पोमा बस्छन् अनि फेदलाई रेट्ने संस्कार हावी भयो ।

तनहुँ
हाल: टोरन्टो, क्यानडा