साहित्यपोस्ट
नेपाली भाषा र साहित्यको सम्पूर्ण पत्रिका

पाँच मुक्तक

Chovar Blues Mobile Size
लोकनाथ पुडासैनी

१.
स्वास्थ्यचौकी स्कूलहरूमा ओत लाग्ने छाना छैन
असहाय दीन दुःखीहरूसँग लाज ढाक्ने नाना छैन
फगत हामी पोस्छौँ गुम्बा चर्च मस्जिद मन्दिर आदि
थाहा छ ? यहाँ कति निमुखासँग छाक टार्ने दाना छैन ?
२.
मोजा हो गनाउने कुरो लगाउनेले जान्नु पर्छ
नयाँ फेर्न नसक्दासम्म त्यही पुरानैले धान्नु पर्छ
नयाँमा पनि नाइलनै मिस्सेको पर्दिन्छ र पो
तिनै दुर्गन्धितहरू मध्यबाटै कुनै छान्नु पर्छ ।
३.
पहिरन फेरिए ढासा स्वाङ र सार उस्ता उस्तै
ढाँट छल तस्करी अनि भ्रष्टाचार उस्ता उस्तै
फेरिँदा केवल सिंहासनमा विराजमान पात्र फेरिए
घोडचढी रिसल्ला लावालस्कर र विचार उस्ता उस्तै ।
४.
पाशुपत क्षेत्रमा सदियौँ देखि बाँदरहरूको झाँकी छ
मोक्ष प्राप्तिका आपेक्षिकहरूको निकै लामो ताँती छ
पार लगाउलान कि भनेको भाङधतुरामै लट्ठिन थाले
अब त यिनका गालामा चड्याम्म पार्न मात्र बाँकी छ ।
५.
खई लागे जस्ता पाता पनि चुहिन सक्छ
ओतमा बस्ने सपना गर्भमै तुहिन सक्छ
कुहिएको आलु बेलैमा झिकेर मिल्काऊ
अन्यथा सिङ्गै बोरा फतक्कै कुहिन सक्छ ।

जराङबेसी, गोरखा
हाल, पोखरा ।

प्रतिक्रिया
Loading...