१
मन जलाई आगो ताप्ने कम छैनन् यहाँ
श्राप दिई आशीष थाप्ने कम छैनन् यहाँ
आफ्नै आकार थाहा छैन कत्रो छु भनी
ठूलो सानो भाग्य नाप्ने कम छैनन् यहाँ ।

२
के नामले तिम्रो उचित सम्बोधन हुन सक्छ
तिमीलाई यस्तो होस् भन्ने मन हुन सक्छ
म त्यही सम्बोधन गरी तिमीलाई बोलाउँला
भन जेले हामीबीच आफ्नोपन हुन सक्छ !

३
भित्ताहरूले कसरी सुन्छन् अचम्म लाग्छ
यताका कुरा उता हुन्छन् अचम्म लाग्छ
विश्वास गरी कसैसँग मन खोल्नै नहुने
आफ्नैले पनि जाल बुन्छन् अचम्म लाग्छ ।

४
कहिलेकाहीं मान्छेहरू यस्तो केही भनेर जान्छन्
सयौँ राम्रा काम गर्नुस् नराम्रो एक गनेर जान्छन्
यो दुनियाँका मान्छेहरू यति स्वार्थी भएका रहेछन्
दोषी तपाईं बन्नुपर्छ उनीहरू निर्दोष बनेर जान्छन्

इटहरी