१

कलानिधि दाहाल

सुनसान  छ  निस्तब्ध गाऊँ यो एक गीतझैँ

पवित्र  दिलमा  पुग्दै   लाऊँ यो एक मितझैँ !

हल्लाका भीडले त्रस्त निकाली  मनका गति

महर्षि  वनका शान्त छाऊँ यो एक जीतझैँ !

* * * *

२

देवी पन्थी

दलित शब्द हटाएर गरिब शब्द राखेको छु

दलित भएर दलित ठग्ने  विरुद्ध लागेको छु,

जातपात छुवाछूत बिउँताउने चेष्टा नगर्नु

त्यस्तालाई झुन्ड्याउन मैले मोटो डोरी बाटेको छु ।

* * * *

३

सुरेश चन्द्र घिमिरे

अब त कतै चहार्दिन भन्दै सत्य कसम खायाै

खुसी भएछन् परिवार सबैको आशीर्वाद पायाै

नानीदेखि लागेको बानी छ सुधार्न  गाह्रो भएछ

फेरि बाह्र बजे रातीमा आई ढाेका ढकढकायाै ।

* * * *

४

नीता गुरूङ भाटिया

मनको  मन्दिरमा  माया बालेर त हेर ।

कमलो  मनमा  मलाई ‌बसालेर हेर ।

शान्ति  पाउनेछौ  सल्केको हृदयमा,

मेरो आँखाको जल तिमी हालेर त हेर ।

* * * *

५

अच्युत घिमिरे

आँखा नै चपट खोलेर हेर्दा लुटेको देखियो

तातो भुङ्ग्रोमा सर्ल्याङ्ङ सर्ल्याङ्ङ भुटेको देखियो

भ्रष्टाचारीको लुट्ने चोर्ने ठग्ने योजनाहरूमा

छल र कपटले जनता नै कुटेको देखियो ।

* * * *

६

नानीमाया सुनुवार

के आफ्नो के पराई उस्तै व्यवहार भएपछि

हिंसा हत्या भ्रष्ट दैनिक अत्याचार भएपछि

गुमनाम भए आमाले दिएका ती संस्कारबाट

क्षणिक मुस्कुराए कैदी पनि उद्धार भएपछि

* * * *

७

कल्पना दाहाल

आँसु पनि होला सायद बाहिरको हाँसोभित्र

मिठो बोली बोल्ने सबै हुन्न रैछन् परम मित्र

मनभित्रको आँखा खोली, मात्र मस्तिष्कले देखे

सबको अर्थ फरकफरक हेर्दा एकै उस्तै चित्र ।

* * * *

८

सुमित्रा पोखरेल

मखमली बगैँचामा  झुले  दाजै

सयपत्री बारी छेउ  फुले  दाजै

यसपालि पनि भिडियो कलमा होला

परदेशीले तिहार टिका भुले दाजै

* * * *

९

रबि श्रेष्ठ

अन्धविश्वास हाबी हुँदा देवदेवता बनेकाछन् निर्जीव ढुङ्गो पनि

त्यही ढुङ्गोमा चढाईन्छ निर्दोष जीव बलि र फूलको थुङ्गो पनि

कस्तो रीति रिवाजको प्रचलन चलेको हो हाम्रो पापी समाजमा,

पापपुण्यको वर्णन कागजमा बाहेक न कतै लाग्याछ टुङ्गो पनि ?

* * * *

१०

घनश्याम पौडेल

शरदको मौसममा फूलहरू फुलेछन्

तिनै फूलमा पुतली र माहुरी डुलेछन्

चारैतिर  रमाइलो र  सौन्दर्य  देखेर

स्वर्गतिर जानुपर्ने परी यतै भुलेछन् ।