१

सहरपिच्छे तिनका दरबार छन्

चिल्ला अनि महङ्गा कार छन्

म यौटा कुरा ठोकुवा गर्छु साथी

दरबार र कारमा प्रायः गद्दार छन्।

२

असत्यलाई जसरी पनि छोप्नै पर्छ

निमुखालाई छुराभाला रोप्नै पर्छ

साँच्चै तपाईं यो देशमै टिक्ने हो भने

भ्रष्ट दलका झन्डा, झोला बोक्नै पर्छ।

३

नेतृत्वलाई विदेशीले चालित बनायो

भ्युटावर अनि बग्रेल्ती सालिक बनायो

गणतन्त्रले देशमा साँच्चिकै चमत्कार गर्यो

जनसेवक हुँ भन्नेलाई मालिक बनायो ।

४

आफ्नो अलग्गै पहिचान हुनुपर्छ

मस्तिष्कभित्र दिव्य ज्ञान हुनुपर्छ

ब्वाँसाको प्रवृत्तिले मान्छे बनिँदैन

मान्छेमा त थोरै इमान हुनुपर्छ ।

५

नाङ्गो आङमा लुगा नै हाल्न नपाएपछि

विभेदपूर्ण नीति नियम फाल्न नपाएपछि

नागरिकताको खोष्टो के काम लाग्छ हजुर

साँझ र बिहान चुलो नै बाल्न नपाएपछि !

६

ममताकी खानी अनि जीवनकी सार हुन्

सृष्टिकै  अलौकिक अनि दिव्य आधार हुन्

जसले रक्सी धोकेर श्रीमती दिनहुँ कुट्छ घरमा

उसैले भन्यो नारी  साक्षात् देवीकी अवतार हुन् ।

सत्यवती—१,रामबारी, गुल्मी